Një nga problemet më të mëdha të Partizanit gjatë këtij sezoni ka qenë pa diskutim numri i lartë i dëmtimeve, element që ndikoi ndjeshëm në ecurinë e skuadrës dhe në rezultatet e arritura përgjatë kampionatit. Të kuqtë u shfaqën shpeshherë të pafat në këtë aspekt, teksa shumë prej lojtarëve kryesorë munguan për periudha të ndryshme për shkak të problemeve fizike.
Dëmtimet e shumta e penalizuan Partizanin sidomos në momentet më të rëndësishme të sezonit, aty ku skuadra kishte nevojë për vazhdimësi në formacion dhe stabilitet në lojë për të luftuar për objektivat madhorë. Megjithatë, mungesat e vazhdueshme e detyruan stafi n teknik që të ndryshonte shpesh rreshtimin dhe të improvizonte në disa reparte të fushës.
Një ndër dëmtimet më të rënda ishte ai i Albers Kekos. Sulmuesi pësoi një dëmtim serioz në ligamentin e gjurit, problem që e mbajti për një kohë të gjatë larg fushave dhe i hoqi Partizanit një alternativë të rëndësishme në repartin ofensiv. Rikthimi i tij erdhi vetëm në fundin e sezonit, atëherë kur objektivat e skuadrës ishin komplikuar ndjeshëm. Po ashtu, probleme të shumta fi zike pati edhe Arafat Dumbia, një prej lojtarëve më të rëndësishëm të mesfushës së të kuqve.
Mesfushori mungoi në disa ndeshje kyçe të kampionatit, duke ulur ndjeshëm forcën dhe balancën e ekipit në repartin qendror. Një tjetër mungesë me peshë ishte edhe ajo e Markut, ndërsa Partizani vuajti për periudha të ndryshme edhe dëmtimet e Skukës, lojtar që pritej të kishte rol të rëndësishëm në repartin ofensiv gjatë sezonit.
Lista e futbollistëve me probleme fi zike nuk përfundon këtu. Edhe emra si Sulo, Martinez, Nondi, Fadairo apo Atanaskoski u përballën me dëmtime gjatë sezonit, duke bërë që trajneri Oltijon Kërnaja të mos kishte asnjëherë në dispozicion grupin e plotë të lojtarëve. Në shumë ndeshje, stafi teknik u detyrua të alternonte formacionin jo për zgjedhje taktike, por për shkak të mungesave të shumta në organikë.
Kjo ndikoi edhe në mungesën e vazhdimësisë në lojën e skuadrës, pasi ekipi nuk arriti të krijonte automatizmat e nevojshme gjatë kampionatit. Në disa raste, futbollistë të caktuar u aktivizuan jashtë roleve të tyre natyrale për të mbuluar boshllëqet e krijuara nga dëmtimet, situatë që ndikoi edhe në performancën kolektive të skuadrës. Përtej problematikave të tjera që shoqëruan Partizanin këtë sezon, dëmtimet mbeten një nga arsyet kryesore që penguan ekipin të kishte stabilitet dhe të shfrytëzonte potencialin e plotë të organikës. Në një kampionat të gjatë dhe me shumë ndeshje vendimtare, mungesa e vazhdueshme e disa prej lojtarëve kryesorë pati ndikim të drejtpërdrejtë në ecurinë negative të të kuqve.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
