Pas 13 vitesh pritjeje, Olimpiakos është rikthyer në majën e basketbollit europian, duke fituar në mënyrë dramatike finalen e EuroLeague. Skuadra greke triumfoi ndaj Real Madrid me rezultatin 92- 85 në finalen e madhe të zhvilluar në “Telecom Center” në Athinë, duke u shpallur kampione për sezonin 2025-2026, titulli i katërt për ekipin grek në këtë kompeticion.
Evan Fournier ishte protagonisti kryesor i ndeshjes me 20 pikë, duke udhëhequr Olimpiakosin drejt triumfit. Kontribut të rëndësishëm dhanë edhe Alec Peters me 16 pikë, Sasha Vezenkov me 12 dhe Thomas Walkup me 10 pikë. Në anën tjetër, Trey Lyles ishte më i miri për Realin me 24 pikë, ku 21 prej tyre i realizoi vetëm në pjesën e parë.
Pas pjesës së parë të mbyllur 46-44 për grekët, drama kulmoi në pjesën e dytë, ku të dy ekipet shkëmbyen vazhdimisht epërsinë. Pas një tresheje të Hezonjës për rezultatin 80-80, Olympiacosi reagoi me një seri vendimtare 8-0, duke marrë kontrollin e finales. Reali tentoi rikthimin në minutat e fundit dhe ngushtoi diferencën në 88- 85. Pas një “rebound”-i ofensiv, madrilenët patën mundësinë të barazonin përmes Feliz, por dominikani gaboi në tentativën për tre pikë dhe Olimpiakosi vulosi fitoren.
Olimpiakosi rikthehet në fronin europian për herë të parë që nga viti 2013, pikërisht kur kishte mposhtur madrilenët në finalen e madhe.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
