Detyrimet e prapambetura u rritën gjatë tremujorit të parë të vitit 2026, pasi kishin pësuar një rënie të ndjeshme në fund të vitit të kaluar. Sipas të dhënave, borxhet arritën në rreth 6.93 miliardë lekë, ose 1.1 miliardë lekë më shumë krahasuar me fundin e vitit 2025.
Sipas Ministrisë së Financave, stoku i detyrimeve të prapambetura të bashkive në mars 2026 rezulton në rreth 3.15 miliardë lekë, me një rritje të lehtë krahasuar me fundvitin 2025.
Edhe pse në korrik të vitit 2025 Ministria e Financave u kërkoi zyrtarisht njësive vendore të hartonin dhe të zbatonin një kalendar të detyrueshëm për shlyerjen graduale të detyrimeve të prapambetura, bashkitë nuk arritën t’i shlyenin ato as deri në fund të vitit të kaluar dhe as gjatë tremujorit të parë të vitit 2026.
Sipas kërkesës së Ministrisë, bashkitë duhej të merrnin masa për një disiplinë më të fortë financiare, të shmangnin krijimin e borxheve të reja dhe të përdornin një pjesë të të ardhurave për shlyerjen e detyrimeve ekzistuese.
Megjithatë, të dhënat më të fundit nga Ministria tregojnë se në disa bashki procesi nuk ka dhënë rezultatet e pritshme. Një pjesë prej tyre jo vetëm që nuk i kanë ulur detyrimet, por kanë regjistruar edhe rritje të stokut të borxhit deri në mars 2026. Nga analiza e të dhënave rezulton se pesë bashkitë me nivelin më të lartë të detyrimeve të prapambetura në mars 2026 janë: Kavaja, Pogradeci, Vora, Tirana dhe Dimali.
