Moise Kouame, tenisti i ri që po mahnit Francën: Ndihem si Mbape

Moise Kouame po bëhet një nga emrat më të përfolur të tenisit francez. 17-vjeçari ka hyrë në histori si lojtari i parë i brezit të lindur në vitin 2009 që fiton një ndeshje në një turne Grand Slam. Suksesi erdhi në “Roland Garros”, ku ai mposhti me 3 sete veteranin Marin Cilic dhe fitoi zemrat e publikut vendas. Kouame konsiderohet një nga talentet më premtues të tenisit modern.

Ai ka thyer disa rekorde për moshën e tij, ishte i pari i lindur në vitin 2009 që fitoi pikë në renditjen ATP, i pari që luajti në një ATP 250 dhe i pari që triumfoi në një ndeshje Masters 1000. Me lojën agresive dhe goditjet e fuqishme, ai po tërheq gjithnjë e më shumë vëmendje në qarkut profesionist. Përveç talentit, Kouame po tregon edhe pjekuri të madhe mentale. Pas fitores ndaj Cilic, ai deklaroi se kishte hyrë në fushë pa presion, duke e konsideruar ndeshjen si një mundësi për të mësuar nga një ish-kampion Grand Slam.

Kjo qetësi dhe vetëbesim po e ndihmojnë të përballojë sfidat e mëdha në moshë shumë të re. Shumë tifozë francezë tashmë e shohin si pasardhësin e Gael Monfils, ndërsa Richard Gasquet e ka cilësuar si një lojtar unik. Vetë Kouame është krahasuar me Kylian Mbappe për mentalitetin fitues dhe dëshirën për të bërë diferencën në momentet më të vështira. Një gjë është e sigurt, presioni nuk duket të jetë problem për të, të paktën për momentin.

Përkundrazi, siç pranoi vetë Moise në Paris: “Kur je në fushë, nuk mendon as për moshën dhe as për çfarë do të hash pas ndeshjes. Mendon vetëm për gjërat që duhet të bësh për të fituar. Dhe unë ndihesha shumë mirë në çdo aspekt”.

Këtë e kuptuan të gjithë, ndoshta edhe idhulli i tij i fëmijërisë, që në vend të raketës përdor këmbët për të shënuar gola: “Ndihem si Mbappe, ai përpiqet të shënojë sa më shumë gola, ndërsa unë përpiqem të luaj goditjen më të vështirë të mundshme për kundërshtarin”. Me rezultatet e fundit, Moise Kouame po ngjitet me shpejtësi në renditjen botërore dhe po shndërrohet në shpresën e re të tenisit francez. Kouame do të rikthehet në fushë sot në orën 11:00 për ndeshjen e raundit 1/32 në “Roland Garros”, teksa përballë do të ketë paraguajanin Adolfo Daniel Vallejo.

© BalkanWeb