Epoka e re me Zizu në stol nis me fitore për Francën, edhe pse ndaj Turqisë nuk ishin brilant, por vuajtën pak për dalë me pikë të plota. Në shifra, kjo ishte një sfidë mes të barabartësh ku diferencën e bëri kapiteni, Kylian Mbappe. Fraksioni i parë prodhoi një episod spektakolar, ku Olise tentoi me një goditje fantastike nga distanca, por në të njëjtën formë iu përgjigj edhe portieri Cakir duke shmangur një gol thuajse të sigurt.
Me fillimin e pjesës së dytë, Mike Maignan iu përgjigj Turqisë, ku në minutën e 50-të devijoi në limite një goditje me kokë të Arda Guler. 5 minuta më vonë, Olise bën atë që di më mirë, dhuroi një assist të pastër për Mbappe, me “gjelin” më të famshëm që nuk fali duke tundur rrjetën me një goditje të saktë brenda në zonë. Festa nuk ishte e plotë, pasi Mbappe menjëherë preku gjurin. Tentoi të qëndronte në fushë, por ishte e pamundur, duke dalë nga fusha pas vetëm 4 minutash, një moment që sjell panik edhe në Madrid.
Djemtë e Zidane menaxhuan me qetësi pjesën e mbetur të këtij takimi, jo vetëm kaq, por flirtuan me golin edhe në dy momente të tjera, ku shtylla e Kounde dhe portieri Cakir u bënë pengesë, edhe pse ky i fundit doli me karton të kuq, duke ndalur me dorë Barcola jashtë zonë. Rezultati mbeti i pandryshuar, me Francën që i bën një nisje me 3 pikë epokës Zidane dhe këtij edicioni të Nations League.
Mendimi i parë i Zidane pas fitores 1-0 përballë Turqisë shkoi pikërisht për Mbappe: “Për fat të keq, situata nuk duket pozitive. Pati një dhimbje në gju gjatë goditjes. Besoj se do të rikthehet në klubin e tij, nuk dëshirojmë të rrezikojmë. Gjithsesi, ishte një ndeshje e parë pozitive. Nuk është e lehtë të luash dhe të fitosh në Turqi. Për mua ishte diçka speciale, lë të shijojmë këtë moment”, u shpreh Zinedine Zidane.
