Dy persona kanë mbetur të plagosur këtë të martë në fshatin Grabovë të Përmetit, pasi dyshohet se janë dëmtuar nga shpërthimi i një lënde plasëse të mbetur nga periudha të mëparshme.
Sipas informacionit paraprak të Policisë së Gjirokastrës, rreth orës 13:00 janë transportuar për ndihmë mjekësore në Spitalin e Përmetit shtetasit E. B., 38 vjeç, dhe M. K., 53 vjeç, të dy banues në Përmet.
Nga veprimet e para hetimore rezulton se të dy personat janë dëmtuar aksidentalisht gjatë kryerjes së punimeve në murin e një banese të vjetër në fshatin Grabovë. Dyshohet se shpërthimi është shkaktuar nga një lëndë plasëse e mbetur nga periudha të mëparshme, e cila mendohet të ketë qenë një bombë e vjetër.
Për shkak të dëmtimeve të marra, të plagosurit janë transportuar për mjekim të specializuar në Spitalin Rajonal të Gjirokastrës, ku ndodhen nën kujdesin e mjekëve.
Ndërkohë, grupi hetimor po vijon veprimet për zbardhjen e plotë të rrethanave të ngjarjes dhe dokumentimin e saj.
