Kryeministri Edi Rama zhvilloi sot një bashkëbisedim me banorë të Zvërnecit, ku u ndal në çështjet e zhvillimit, investimeve dhe pronësisë në zonë.
Duke iu përgjigjur një qytetari që kërkoi të mos largohen investitorët nga zona, Rama u shpreh se prioritet duhet të jetë pastërtia dhe menaxhimi i mbetjeve, duke theksuar rolin e bizneseve në këtë drejtim.
“Mbani pastër zonën tuaj, sepse problemi më i madh në gjithë këtë territor janë bizneset sa i përket pastërtisë, sepse sasinë më të madhe të mbeturinave e prodhojnë bizneset, hotelet, restorantet. Kjo është kryesorja”, u shpreh ai.
Ai shtoi se çështjet e investimeve nuk përcaktohen nga protestat apo grupet që dalin në rrugë, por nga vendimmarrja institucionale dhe proceset demokratike.
“Nuk e përcaktojnë ata që dalin në rrugë dhe thonë ‘do vendosim ne, se ne jemi populli’. Si populli? Po ata që votojnë çfarë janë? Nuk janë populli ata? Jo 5 mijë veta, po 500 mijë të dalin në shesh nuk mjaftojnë. Sepse janë 800 e kusur mijë që kanë bërë marrëveshje me mua dhe me PS-në”, deklaroi Rama.
Kryeministri solli si shembull zhvillimin e Tivatit në Mal të Zi falë projektit të Porto Montenegro-s, duke e cilësuar si një rast transformimi përmes investimeve turistike.
“Tivati ka qenë vendi më i pazhvilluar i Malit të Zi, një bazë e vjetër ushtarake e Jugosllavisë, me 10 mijë banorë dhe pa turistë. Papunësia ishte e lartë dhe rinia largohej. Fati që duhej ta kishte kapur Shqipëria, ishte një investitor i madh kanadez, por ai u trajtua në mënyrë skandaloze dhe u largua”, tha ai.
Rama shtoi se në Mal të Zi zhvillimi i turizmit ka sjellë rritje të ndjeshme të numrit të turistëve dhe të të ardhurave, duke transformuar ekonominë lokale.
“Sot Tivati ka rreth 5 milionë turistë në vit dhe është një nga zonat që kontribuon më shumë në taksat e Malit të Zi. Çmimi i pronës ka shkuar nga 400 euro për metër katror, në 12 mijë euro në Porto Montenegro dhe deri në 4 mijë euro në zona të tjera”, u shpreh Kryeministri.
Ai theksoi se një zhvillim i tillë ndikon drejtpërdrejt edhe në ekonominë e komuniteteve përreth, përfshirë bizneset e vogla, shërbimet dhe sektorin bujqësor.
Sipas tij, turizmi sjell një zinxhir ekonomik të gjerë, ku përfitimet shpërndahen në gjithë territorin.
Rama u ndal edhe te debati për punëtorët e huaj, duke theksuar se mungesa e fuqisë punëtore është një fenomen rajonal dhe europian.
“Fenomeni i punëtorëve që vijën nga jashtë është fenomen i përgjithshëm në Greqi, Itali, në Filipine janë në radhë të gjitha shtetet e Evropës për të marrë punëtorë. Edhe ne atje jemi në radhë se ka nevojë për krahë pune”, tha Rama.
Kryeministri theksoi se investimi në Zvërnec nuk përfshin vetëm hotele dhe vila, por edhe spital dhe shkollë turizmi.
