Bashkimi Demokratik i Minoritetit Etnik Grek (OMONIA), përmes një komunikate për shtyp, ka akuzuar deputetin socialist Ardit Bido, se ka përdorur gjuhë urrejtjeje ndaj ‘komunitetit etnik grek’ në Shqipëri, pas debateve për ‘Zvërnecin’.
Përmes komunikatës, OMONIA akuzon Ardit Bidon se ka përdorur një gjuhë të papërshtatshme në një emision televiziv, ndaj deputetit të Lëvizjes Bashkë, Redi Muçi (i cili ka origjinë minoritare greke).
“Tejkalon çdo precedent transmetimi i djeshëm që në tërësi ju disponua emisioni, pa vërejtje për neutralitet dhe përmbajtje ndaj standarteve, një deputeti të kampit të shumicës qeverisëse për të ushtruar dhunë retorike ndaj një kolegu të tij që i përket origjinës dhe identitetit Helenik. Debati nuk ju referua qëndrimit dhe pikëpamjeve dhe deputeti i targetuar nuk i përket spektrit të aktivistëve për të drejta të Minoritetit Etnik Grek”, thuhet mes të tjerash në komunikatën e OMONIA-s.
Ndërkohë Bido, përmes një postimi në rrjetet sociale, është përgjigjur duke thënë se OMONIA ka marrë në mbrojtje Redi Muçin, pasi sipas tij, ata po përpiqen t’i imponojnë protestës për ‘Zvërnecin’ teza politike që nuk kanë asnjë lidhje me problemin real të banorëve.
Më tej Bido ka thënë se nuk kishte asnjë lidhje mes OMONIA-s dhe Lëvizjes Bashkë, që organizata e minoritetit grek të merrte në mbrojtje Redi Muçin.
Sipas Bidos, elementë të caktuar të politikës greke dhe asaj shqiptare po përpiqen të fusin ‘minoritetin grek’ në vendin ku pritet të ndërtohet resorti në Zvërnec të Vlorës.
“I hoqën maskat: OMONIA e Dules mbron Muçin e Lëvizjes Bashkë, se janë bashkë në vorioepirotizëm. OMONIA doli sot me një deklaratë për shtyp për të mbrojtur Redi Muçin dhe Lëvizjen Bashkë, ndërsa më sulmoi mua. Pyetja është e thjeshtë: ç’lidhje kanë OMONIA dhe Vangjel Dule me Redi Muçin dhe Lëvizjen Bashkë? Ç’lidhje ka një organizatë e minoritetit grek me një lëvizje marksiste dhe neokomuniste? E thashë qartë edhe mbrëmë në emision: nuk kam asgjë kundër minoritetit grek. Përkundrazi. Sarandiotët e dinë mirë marrëdhënien time me vëllezërit minoritarë. Sulmin e tyre e prisja, sepse prej ditësh po ua nxjerr zbuluar tezat. Problemi është se po përpiqen t’i imponojnë kësaj proteste teza politike që nuk kanë asnjë lidhje me problemin real të banorëve dhe po fshihen pas kauzave të tjera. Kjo është një protestë energjike dhe qytetare. Nuk duhet të devijohet nga askush për interesa dhe axhenda që nuk janë të sajat. Fakti që sot OMONIA doli në mbrojtje të Redi Muçit dhe të tezave që kam denoncuar prej ditësh flet më qartë se çdo fakt që mund të sillja unë. Vazhdoni bëni sikur nuk kuptoni, se këta do i nxjerrin maskat vetë dhe pastaj do shohim kush ka të drejtë. Sa keni këta në krah, e tezat e tyre në krye, më keni KUNDËR!”, është shprehur Bido.
