Gazeta greke “Kathimerini” shkruan se ministri i Jashtëm Giorgos Gerapetritis i dërgoi një mesazh të qartë Tiranës nga seanca plenare e Parlamentit në lidhje me të drejtat e pronës së pakicës greke.
“Kathimerini” shkruan se pas incidenteve të fundit në Shqipëri, në sfondin e planeve të investimeve në vijën bregdetare shqiptare në veri të Vlorës, “Gerapetritis e bëri të qartë se rruga e Shqipërisë drejt familjes evropiane ka si parakusht respektimin e të drejtave të pakicave”.
Ai theksoi gjithashtu se Athina po i monitoron nga afër zhvillimet.
“Jemi në gatishmëri të plotë”, vuri në dukje ai. “Po e monitorojmë nga afër çështjen e pronave dhe pata mundësinë t’i them personalisht Ministrit të Jashtëm të Shqipërisë se nuk është e mundur të bëhet përparim në proces pa respekt të plotë për të drejtat pronësore të pakicave”, – tha ai në Parlament, duke iu përgjigjur një pyetjeje nga deputeti i pavarur Michalis Hourdakis.
“Është e qartë se Greqia ka çdo arsye, historike dhe kombëtare, por edhe sot në rrethanat dhe gjeopolitike, për të qenë ajo që mban çelësin, vendi që po përshpejton procesin për integrimin e Ballkanit Perëndimor në Familjen Europiane”, – shtoi Ministri i Jashtëm i Greqisë.
Ai theksoi se një parakusht në diskutimin që po zhvillohet është “përputhja e plotë me të drejtën ndërkombëtare, veçanërisht me të drejtën e detit” për hyrjen e Shqipërisë në BE.
