Kryeministri Edi Rama, gjatë fjalës së tij në mbledhjen e Grupit Parlamentar të PS-së ka shënjestruar kritikët e PS-së që pasi kanë rënë nga karriget e pushtetit kanë nisur të bëjnë luftë ndaj saj.
Rama iu përgjigj Elisa Spiropalit, Arta Dades, Arben Malajt & CO që njihen si kritikë të fundit ndaj kryeministrit, duke thënë se pasi e kalëruan sa mundën partinë, pasi ranë nga kali, tani e gjuajnë me këpucët e blera nga shopingjet majë kalit.
“Një grumbullim i hatashëm gjërash që as janë njësoj, as janë bashkë, po u mblodhën së bashku në një prurje që nxori në bregun e gjithë këtij oqeani virtual deri dhe dhëmbë të atyre që e kalëruan këtë parti sa mundën dhe, kur ranë nga kali, filluan të gjuanin me këpucët e blera në shoppingjet majë kali. Befas, Zvërneci u bë kërthiza e botës ku po vendosej fati i ngrohjes globale. Bulevardi i Tiranës u bë sheshi Tiananmen, ku qindra mijëra njerëz, sipas vetë senatorit të nderuar Berni Sanders, iu turrën oligarkisë botërore dhe bota shqiptare u njësua me histerinë e kanaleve sociale, duke bashkuar në një armatë të vetme çlirimtare zogjtë më elegantë të botës, flamingot, me fundin e kanalit digjital, bullistët e terrorit online”, tha Rama.
