Zaire Wade, djali i madh i legjendës së NBA-së, Dwyane Wade, është arrestuar në Kaliforni dhe përballet me akuza të rënda pas një ndërhyrjeje të policisë në një banesë në qytetin e Burbank. Sipas raportimeve të TMZ, 23-vjeçari u vu në pranga me akuzat për dhunë të rëndë në familje, kërcënime kriminale dhe mbajtje të paligjshme, ndërsa ndaj tij është lëshuar edhe një urdhër mbrojtës emergjent. Autoritetet nuk kanë bërë publike detaje të tjera mbi ngjarjen.
Policia ndërhyri rreth orës 05:30 të mëngjesit të së dielës, pas një telefonate që sinjalizonte britmat e një gruaje brenda banesës. Kur efektivët mbërritën në vendngjarje, gjetën Zaire Wade dhe një grua, e cila kishte lëndime në fytyrë dhe në trup.
Megjithëse kishte pësuar dëmtime, gruaja nuk u transportua në spital. Ndërkohë, Zaire Wade u lirua më vonë gjatë ditës pasi pagoi një garanci prej 50 mijë dollarësh. Zaire Wade e nisi karrierën e tij në basketboll me ekipin e njohur të shkollës Sierra Canyon në Kaliforni, ku tërhoqi vëmendjen e shumë universiteteve amerikane. Ai vendosi të mos pranonte bursat universitare për të ndjekur një karrierë profesionale, duke luajtur më pas me Salt Lake City Stars në NBA G League, si edhe me skuadra në Afrikën e Jugut dhe Makao.
Rasti mbetet nën hetim, ndërsa autoritetet pritet të zbardhin më shumë detaje në ditët në vijim.
