Pas përfundimit të fjalimeve në Bulevard, protestuesit kanë vijuar me marshimin nëpër rrugët e Tiranës.
Edhe gjatë ditës së sotme nuk kanë munguar akuzat ndaj qeverisë si dhe kërkesës për dorëheqjen e kryeministrit Edi Rama.
“Kam 42 ditë që vij këtu, Jam i gatshëm të rri dhe për 420 të tjera derisa sa kjo klasë politike të shporret. Ky sistem nuk na përfaqëson ne, shqiptarët e ndershëm që për 42 ditë po i tregojnë vetës e botës që nuk pajtohen me të keqen”, tha një protestues gjatë fjalimeve para Kryeministrisë.
“Ne jemi rritur mes gëzhojash. Mos harrojmë Gërdecin, 21 janarin dhe aferat korruptive. Infrastruktura është lënë përgjysmë, në fshatin tim rruga nuk bëhet prej 40 vitesh, ndërkohë 4.2 milionë euro shkojnë për një fashist”, tha aktivisti Arbër Lleshi.
Kritikat nga podiumi shkuan për investimin 4 milionë euro të qeverisë për koncertin e këngëtarit amerikan Kanye West.
“Fermerët i ka shpallur armiq të vendit. Në vend që të dëmshpërblejë fermerët e përmbytur, shkon i jep 4 mln euro një këngëtari që nuk i hyn njeriu në punë”, tha një fermer.
“Tek pediatria nuk kishte gjenerator dhe karburant. Për interesa personale të dikujt që nuk dua t’ia përmend emrin, 4 mln euro e kusur paguhen për të paraqitur Shqipërinë kështu”, tha një tjetër protestues.
Në ditën e 42-të të protestës u ritheksuan 5 kërkesat e mëparshme drejtuar qeverisë, duke bërë thirrje për dorëheqjen e Ramës.
