Autoriteti Rrugor Shqiptar hapi së fundmi tre procedura prokurimi me vlerë të kombinuar rreth 474.7 milionë lekë, ose afërsisht 4.8 milionë euro, për ndërhyrje në sinjalistikën dhe pajisjet e sigurisë rrugore në veri, jug dhe në rajonin Qendër-Lindje.
Procedurat mbulojnë përmirësimin e sinjalistikës horizontale dhe vertikale, vendosjen ose zëvendësimin e barrierave mbrojtëse, ndriçimin e kryqëzimeve dhe riparimin e fugave të urave në disa prej akseve kryesore të rrjetit kombëtar.
Fondi më i madh është parashikuar për Rajonin Jugor, Loti 3, me 187.46 milionë lekë. Një vlerë e ngjashme, prej 187.44 milionë lekësh, është caktuar për Rajonin Verior, Loti 1, ndërsa tenderi për Rajonin Qendër-Lindje, Loti 4, ka fond limit 99.84 milionë lekë. Sipas raporteve teknike, akset janë përzgjedhur pas inspektimeve në terren dhe vlerësimit të fluksit të trafikut, rëndësisë në rrjet, lidhjeve me pikat kufitare dhe nevojës për ndërhyrje në elementet ekzistuese të sigurisë.
Akset në Veri
Në veri, projekti përfshin Bypass-in e Shkodrës, aksin Vau i Dejës–Pukë–Kthesa e Hadrojit, segmentin Kthesa e Hadrojit–Fushë-Arrëz–Kalimash, si dhe rrugët Klos–Qafë Buall dhe Ura e Cerenecit–Maqellarë. Gjatësia e segmenteve të listuara në raport shkon nga 8.16 kilometra në Bypass-in e Shkodrës deri në 62.7 kilometra në aksin Kthesa e Hadrojit–Fushë-Arrëz–Kalimash.
Loti verior përfshin gjithashtu ndriçimin e kryqëzimit të Komanit në segmentin Shkodër–Pukë dhe të kryqëzimit Aliaj në aksin Shkodër–Hani i Hotit. Riparime të fugave të urave janë parashikuar në segmentet Milot–Lezhë, Lezhë–Shkodër, Shkodër–Hani i Hotit dhe Shkodër–Velipojë.
Akset ne Jug
Në jug, ndërhyrjet janë përqendruar në autostradën Mbrostar–Levan, pjesë e A2, me gjatësi 22.3 kilometra, dhe në aksin Mallakastër–Tepelenë–Dogana Kakavijë, pjesë e SH4, me gjatësi 85.8 kilometra.
Raporti parashikon ndriçim në kryqëzimet e rrezikshme përgjatë segmentit Mallakastër–Dogana Kakavijë, si dhe riparimin e fugave të urave në aksin Vlorë–Levan. Segmenti Mbrostar–Levan përshkruhet si një rrugë interurbane kryesore me nga dy korsi për çdo drejtim dhe me rol lidhës për zonat me aktivitet ekonomik dhe qarkullimin drejt Tiranës.
Akset në Qendër-Lindje
Në Rajonin Qendër-Lindje, punimet do të shtrihen në segmentet Urakë–Golik i Poshtëm, Unaza Librazhd–Zgosht, Drizë–Kanioni i Holtës, Kryqëzimi i Podgories–Kryqëzimi i Liqenasit, Kryqëzimi Libonik–Ura në Maliq dhe Kryqëzimi i Gështenjasit në aksin Pogradec–Korçë.
Ndriçim është planifikuar në një seri kryqëzimesh, mes tyre Urakë–Golik, Podgorie–Liqenas, Boboshticë–Qatrom, Gështenjas, Qafë Plloçë, Korçë–Voskop, Leminot dhe Unaza e Ersekës. Dokumenti përfshin edhe riparimin e fugave të urës në Çërravë, Korçë.
Raportet teknike evidentojnë si problematika kryesore mungesën e retroreflektimit gjatë natës, dëmtimet, vandalizmin, shkatërrimin dhe vjetërsinë e sinjaleve rrugore. Ndërhyrjet nuk kufizohen vetëm në rifreskimin e vijëzimeve dhe tabelave ekzistuese. Projektet parashikojnë edhe shtimin e elementeve që mungojnë, zëvendësimin e pajisjeve të dëmtuara dhe vendosjen e sistemeve të reja të kufizimit rrugor. Në këto sisteme përfshihen barriera prej çeliku dhe betoni, amortizatorë goditjeje, terminale, barriera të lëvizshme dhe parmakë metalikë për këmbësorët./ Monitor
