Statistikat e INSTAT për muajin maj tregojnë një rritje të turizmit, ku numri i vizitorëve në strukturat akomoduese është rritur me 12,4% krahasuar me të njëjtën periudhë të vitit të kaluar.
Ky fluks i udhëhequr nga një rritje e vizitorëve jorezidentë me 12,7% ka sjellë një rritje të kërkesës për hotele dhe shërbime, duke çuar shfrytëzimin e dhomave në 29,8%, krahasuar me 28,7% në maj 2025.
Ndërsa industria e turizmit përballet me këto shifra, vihet në pikëpyetje kostoja e këtij suksesi për qytetarët vendas.
Problemi kryesor qëndron te shtrenjtimi i shërbimeve, fakt që po e kthen bregdetin në një destinacion gjithnjë e më të vështirë për t’u përballuar nga familjet shqiptare.
Rajoni i Jugut mbetet më i kërkuari, ku numri i vizitorëve jorezidentë u rrit nga 71.351 në maj 2025, në 83.195 në maj 2026. Ky përqendrim i lartë i vizitorëve të huaj sidomos nga Italia, Kosova dhe Gjermania ka diktuar një orientim të tregut drejt çmimeve ndërkombëtare.
Kjo prirje bëhet edhe më e dukshme kur vëzhgojmë tregun digjital. Mjafton një kërkim i thjeshtë në platformat Booking apo Airbnb për strukturat akomoduese në zonat bregdetare të jugut për të kuptuar rritjen e konsiderueshme të çmimeve, ku shpesh raporti midis kostos dhe cilësisë së shërbimit të ofruar nuk është i justifikuar.
Suksesi i turizmit nuk duhet të varet vetëm nga sa të huaj vizitojnë vendin tonë. Turizmi i vërtetë duhet t’u japë mundësi edhe shqiptarëve që të shijojnë bukuritë e vendit të tyre, pa u detyruar të shpenzojnë shuma që nuk i përballojnë dot.
