Bota e futbollit është tronditur nga lajmi për ndarjen nga jeta të legjendës së AC Milan dhe kombëtares italiane, Franco Baresi, i cili u shua në moshën 66-vjeçare.
Lajmi u konfirmua nga AC Milan me një mesazh prekës, ku klubi i dha lamtumirën një prej figurave më të mëdha në historinë e tij.
“Historia e AC Milan është në lot pas ndarjes nga jeta të Franco Baresi. Shembulli dhe ndikimi i tij i thellë, ashtu si fanella e tij me numrin 6, do të jenë përgjithmonë pjesë integrale e ADN-së dhe historisë së klubit. Ngushëllimet tona shkojnë për familjen e Franco Baresi dhe për të gjithë tifozët kuqezi në këtë moment të dhimbshëm”, thuhet në reagimin zyrtar të klubit.
Baresi kishte kaluar një periudhë të vështirë shëndetësore pasi në vitin 2025 iu nënshtrua një operacioni për një nyje në mushkëri. Pavarësisht kësaj, ai ishte rikthyer së fundmi në stadiumin “San Siro” dhe ishte ndër mbajtësit e fundit të pishtarit olimpik në ceremoninë hapëse të Lojërave Olimpike Dimërore Milano-Cortina 2026.
I konsideruar si një nga mbrojtësit më të mëdhenj në historinë e futbollit, Franco Baresi e kaloi të gjithë karrierën e tij te AC Milan, ku zhvilloi 719 ndeshje zyrtare. Me fanellën kuqezi fitoi gjashtë tituj të Serie A dhe tre trofe të Kupës së Kampionëve Evropianë/Ligës së Kampionëve, duke u shndërruar në simbol të klubit.
Me kombëtaren e Italisë ai regjistroi 81 paraqitje dhe ishte pjesë e skuadrës që fitoi Kupën e Botës në vitin 1982, duke lënë një trashëgimi të jashtëzakonshme në futbollin italian dhe atë botëror.
Ndarja e tij nga jeta shënon fundin e një epoke për AC Milan dhe futbollin ndërkombëtar, ndërsa emri i Franco Baresit do të mbetet përgjithmonë sinonim i besnikërisë, lidershipit dhe madhështisë në fushën e lojës.
