Një vatër zjarri ka përfshirë në një terren të vështirë malor, në kufirin ndarës mes fshatrave Golem dhe Progonat të Gjirokastrës.
Pas sinjalizimit të marrë nga Agjencia Kombëtare e Mbrojtjes Civile (AKMC), drejt vendngjarjes është nisur menjëherë një grup i shërbimit zjarrfikës për të bërë të mundur lokalizimin e flakëve.
Me mbërritjen në terren, efektivët konstatuan se vatra ndodhej në majë të malit, në një zonë me terren tejet të vështirë, çka e bënte ndërhyrjen më të vështirë.
Falë ndërhyrjes së menjëhershme dhe punës së forcave zjarrfikëse, u bë e mundur fillimisht izolimi i vatrës dhe më pas shuarja e plotë e zjarrit, duke parandaluar përhapjen e mëtejshme të flakëve në zonat përreth.
Nga zjarri u përshkua një sipërfaqe prej rreth 3 hektarësh, e përbërë kryesisht nga bimësi e ulët, shkurre dhe barishte.
Shërbimi zjarrfikës vijon të qëndrojë në vendngjarje, ndërsa po monitoron territorin për të parandaluar dhe evidentuar çdo riaktivizim të mundshëm të zjarrit.
