Bota italiane e garave të kuajve vajton Varenne-n, “Kapitenin” legjendar, që konsiderohet si një nga kuajt më të mëdhenj të të gjitha kohërave. Ai ndërroi jetë sot në moshën 31-vjeçare. “Me hidhërim të thellë njoftojmë vdekjen e Kapitenit,” thuhet në faqen e Instagramit të kalit legjendar. Ai ngordhi në fermën e mbarështimit LJ në Eboli, në provincën e Salernos, ku kishte kaluar vitet e fundit të jetës.
“Varenne ndërroi jetë gjatë natës dhe veterineri konfirmoi se shkaku ishte një atak i papritur në zemër. Jemi të shkatërruar nga lajmi i marrë këtë mëngjes dhe duam ta kujtojmë atë — së bashku me të gjithë fansat e tij — ndërsa vraponte drejt fitoreve. Sot, krahët e Varenne-s e kanë çuar atë diku tjetër. Vrapo i lirë përgjithmonë dhe mbetu Kapiteni ynë përjetë. Dheu të qoftë i lehtë. Me shumë dashuri. Shko dhe bashkohu me Enzon atje lart.”
Garat e fituara nga Varenne
I lindur më 19 maj 1995 në Copparo (Ferrara), në fermën e mbarështimit “Zenzalino”, ai ishte pasardhës i kalit mashkull amerikan Waikiki Beach dhe pelës italiane Ialmaz. Ai u ble nga Enzo Giordano për 180 milionë lira pas një gare debutuese premtuese, por fatkeqe, dhe iu besua trajnerit finlandez Jori Turja dhe kalorësit roman Giampaolo Minnucci, me të cilin bashkëpunoi gjatë pothuajse gjithë karrierës së tij. Gjatë karrierës, ai arriti 62 fitore në 73 gara, duke fituar mbi 6 milionë euro në çmime monetare.
Fitues dy herë i “Grand Slam”-it
Sukseset e tij kryesore përfshijnë “Derby”-n italian të garave me karrocë (1998), “Gran Premio Lotteria di Agnano” (2000, 2001 dhe 2002), “Prix d’Amérique” (2001 dhe 2002), “Elitloppet” (2001 dhe 2002) dhe “Breeders Crown” (2001). Në vitin 2001, ai fitoi tri garat kryesore evropiane të këtij lloji — “Prix d’Amérique”, “Lotteria” dhe
“Elitloppet” — brenda një viti të vetëm, të pasuara nga “Breeders Crown” në Shtetet e Bashkuara. Vitin pasues, ai e përsëriti suksesin në “Grand Slam” dhe e mbylli karrierën garuese me një turne botëror që përfundoi në Montreal më 28 shtator.
Pas tërheqjes nga garat në vitin 2002, ai vazhdoi rrugëtimin e tij si kalë mbarështues, duke u bërë një ikonë e mbarështimit italian të kuajve.
