Gjilani dhe Dukagjini kanë ndarë pikët në kuadër të xhiros së tretë të Albi Mall Superligës së Kosovës, pasi ndeshja e zhvilluar të shtunën në stadiumin e Gjilanit përfundoi me rezultat 2:2.
Kjo ndeshje kishte një veçanti të rëndësishme, pasi u zhvillua nën dritën e sistemit të ri të reflektorëve, të vendosur në kuadër të projektit të FFK-së, “Ndriçojmë Futbollin”.
Gjilani e nisi më mirë ndeshjen dhe kaloi në epërsi në minutën e 9-të. Blerind Morina realizoi një supergol nga goditja e dënimit për 1:0.
Dukagjini reagoi në minutën e 20-të, kur Mërgim Pefqeli shënoi për ta barazuar rezultatin në 1:1.
Skuadra vendëse riktheu epërsinë në minutën e 38-të. Arbër Potoku realizoi për 2:1, rezultat me të cilin u mbyll pjesa e parë.
Në pjesën e dytë, Dukagjini arriti ta barazojë sërish rezultatin. Dienit Isufi shënoi në minutën e 54-t për 2:2, duke i siguruar skuadrës nga Klina një pikë.
Ky ishte barazimi i parë për Gjilanin në këtë edicion, pas dy fitoreve në dy xhirot e para, ndërsa Dukagjini regjistroi barazimin e dytë, krahas një fitoreje.
Përtej rezultatit sportiv, ndeshja e sontme në Gjilan shënoi një tjetër moment të rëndësishëm për projektin “Ndriçojmë Futbollin”, përmes të cilit Federata e Futbollit e Kosovës po kontribuon në modernizimin e infrastrukturës së futbollit në vend.
Pas stadiumit “18 Qershori” në Klinë, ku ndeshjet tashmë mund të zhvillohen nën reflektorë, projekti ka mbërritur edhe në Gjilan.
Ky investim ka rëndësi të veçantë për futbollin gjilanas, pasi stadiumi është shtëpi e dy klubeve të qytetit, SC Gjilani dhe FC Drita. Sistemi i ri i ndriçimit u krijon mundësi ekipeve që ndeshjet t’i zhvillojnë edhe në orët e mbrëmjes, në kushte më të mira për futbollistët, tifozët dhe organizimin e ndeshjeve.
Nga Klina në Gjilan, e së shpejti edhe në Skenderaj, Federata e Futbollit e Kosovës po vazhdon me realizimin hap pas hapi të projektit “Ndriçojmë Futbollin”.
Ndërkohë, Malisheva është rikthyer te fitorja pasi triumfoi bindshëm në udhëtim ndaj Feronikelit ’74, me rezultat 0:3.
Protagonisti kryesor i fitores së Malishevës ishte Kreshnik Uka, i cili realizoi dy gola.
Uka e zhbllokoi rezultatin në minutën e 10-të, duke i dhënë epërsinë skuadrës mysafire. Malisheva e dyfishoi avantazhin në minutën e 24-t, kur Laurent Xhylani u tregua i saktë nga pika e bardhë.
Në pjesën e dytë, Uka shënoi edhe golin e tij të dytë personal në minutën e 56-të, duke vulosur fitoren e Malishevës me rezultat 0:3.
Pas tri xhirove, Malisheva ka grumbulluar 7 pikë, ndërsa Feronikeli ’74 vazhdon pa pikë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
