Sipas Ministrisë së Mbrojtjes strukturat e Mbrojtjes Civile kanë arritur të shuajnë 7 vatra zjarri nga 21 që u raportuan gjatë ditës së sotme në të gjithë Shqipërinë. Aktualisht 5 vatra vijojnë të jenë aktive, ndërsa 9 të tjera mbahen nën kontroll dhe monitorim të vazhdueshëm nga forcat në terren.
Përballimi i flakëve ka kërkuar angazhim maksimal. Në operacione janë përfshirë 324 efektivë të strukturave vendore dhe 17 zjarrfikëse, të mbështetur nga 92 trupa të Forcave të Armatosura me 10 automjete, 1 dron për vëzhgim ajror dhe 1 ambulancë. Ndërhyrja ka qenë e shpërndarë në disa qarqe, ku situata paraqitet e ndryshme.
Në Tiranë, zjarri që përfshiu Malin e Dajtit është neutralizuar plotësisht falë ndërhyrjes së 33 ushtarakëve, ndërsa vatra në Malin me Gropa është izoluar.
Në veri, problematike mbetet Shkodra me vatër aktive në Porav të Fushë-Arrëzit, ndërsa Rragami dhe Mali i Tërbunit mbahen nën mbikëqyrje pa rrezik për banesat. Në Dibër flakët vijojnë në Lundre-Madhesh, Cerrujë dhe Selishtë, me Qafën e Helmes nën monitorim.
Ndërkohë në jug, Çërrila në Mallakastër vijon aktive por e izoluar, me 32 forca ushtarake në mbështetje. Nën mbikëqyrje mbeten vatrat në Peshtan të Fierit, Gallatë të Kurbinit ku ndërhyrja pengohet nga terreni, Opar të Korçës, si dhe vatrat në qarqet Lezhë dhe Elbasan.
AKMC bën me dije se nuk ka rrezik për banesa dhe se të gjitha kapacitetet mbeten në gatishmëri me prioritet jetën dhe pronën e qytetarëve.
