Fishkëllima të shumta në fund të ndeshjes në WWK Arena, aty ku Gjermania u mposht 0-1 në shtëpi nga Greqia.
Për Jürgen Klopp, kjo ishte ndeshja e dytë në stolin e “Die Mannschaft”, por fitorja e parë ende nuk ka ardhur. Pas barazimit në Amsterdam ndaj Holandës, trajneri gjerman përjetoi një zhgënjim, teksa ekipi I tij pësoi një humbje të papritur ndaj “helenëve”.
Kritikat nuk munguan, ndërsa një prej zërave më të ashpër ishte ai i ish-kampionit të botës, Bastian Schweinsteiger. Ai theksoi se Gjermania nuk është më një skuadër e nivelit të lartë dhe se lojtarët duhet të marrin më shumë përgjegjësi.
“Klopp nuk është magjistar. Është një proces pune, por edhe lojtarët duhet të bëjnë autokritikë”, deklaroi Schweinsteiger.
Megjithatë, Klopp ka një argument të fortë në këtë fillim të aventurës së tij. Trajneri po tenton të ndërtojë një Gjermani të re, duke zgjeruar grupin dhe duke testuar sa më shumë futbollistë. Deri tani, plot 44 lojtarë janë grumbulluar, ndërsa puna taktike ka qenë e kufizuar në vetëm katër seanca stërvitore.
Objektivi është rindërtimi i skuadrës pas zhgënjimit në Botëror, por një projekt i tillë kërkon kohë. Një situatë e ngjashme po përjetohet edhe në Itali, ku Roberto Mancini ka grumbulluar 33 lojtarë, me synimin për të testuar të rinjtë dhe për të krijuar bazën e një kombëtareje të re.
Në të dyja kampet, rezultatet e para nuk kanë qenë ideale, por projektet e reja sapo kanë nisur dhe puna për një skuadër konkurruese vazhdon. Gjermania beson te projekti I Klopp, por ish teknikun e Liverpool më shumë se çdo gjë tjetër do duhet ta ndihmojnë rezultatet në fushë, që për “panzerat” tanimë janë njբ oksigjen shumë i nevojshëm.
