Një sërë problematikash në administrimin e fondeve publike, realizimin e investimeve, mbledhjen e taksave dhe administrimin e pronave publike janë evidentuar nga Kontrolli i Lartë i Shtetit në Bashkinë Dropull.
Raporti përfundimtar i auditimit financiar për vitin 2025, i hartuar në tetor 2026, evidenton 20 gjetje dhe 21 rekomandime për përmirësimin e veprimtarisë së institucionit. Për shkak të devijimeve materiale nga kuadri ligjor dhe rregullator, KLSH ka dhënë një opinion të kualifikuar për pasqyrat financiare të bashkisë.
Një prej konstatimeve lidhet me pesë investime publike, ku janë evidentuar diferenca ndërmjet volumeve të punimeve të paraqitura për pagesë dhe atyre të realizuara në terren. Vlera totale e kërkuar për t’u arkëtuar nga kompanitë sipërmarrëse është 785 906 lekë pa TVSH.
Rastet përfshijnë rikonstruksionin e shkollës së mesme dhe kopshtit në Bularat, me 245 771 lekë punime të pakryera; mbrojtjen nga përroi i Selosë, me 104 835 lekë; rikonstruksionin e rrjetit rrugor Poliçan–Dhrimadhes në Pogon, me 210 mijë lekë; rrugën Sofratikë–Terihat, me 152 mijë lekë; si dhe projektin për përmirësimin e banesave të komuniteteve të varfra dhe të pafavorizuara, me 73 300 lekë.
KLSH kërkon arkëtimin e këtyre vlerave nga kompanitë përkatëse. Raporti sqaron se këto pesë masa janë pjesë e rekomandimeve të mëparshme të auditimit të përputhshmërisë dhe nuk janë shqyrtuar si gjetje të reja në auditimin financiar aktual.
12.4 milionë lekë detyrime të pambledhura
Një tjetër problematikë e rëndësishme është administrimi i detyrimeve financiare të qytetarëve dhe bizneseve ndaj bashkisë.
Në fund të vitit 2025, detyrimet debitore të regjistruara arrinin në 12 469 452 lekë. Prej tyre, 6 810 589 lekë janë detyrime të trashëguara nga periudha 2011–2024, kryesisht nga taksat e tokës bujqësore, ndërtesave dhe biznesit.
KLSH konstaton se Bashkia Dropull nuk ka kryer procedurat e nevojshme për kërkimin e këtyre detyrimeve në rrugë administrative dhe gjyqësore, pavarësisht se problematika është evidentuar edhe në auditimet e mëparshme.
Sipas audituesve, mosndjekja në kohë e debitorëve krijon rrezikun e parashkrimit të detyrimeve dhe humbjes së të ardhurave për buxhetin vendor.
4.5 milionë lekë garanci të bllokuara në Thesar
Raporti evidenton gjithashtu se për 13 objekte të përfunduara dhe të marra në dorëzim nuk janë zhbllokuar garancitë e punimeve, megjithëse periudha e garancisë kishte përfunduar.
Vlera e fondeve të mbajtura në Thesar arrin në 4 569 489 lekë. Sipas KLSH-së, Drejtoria e Financës dhe Buxhetit dhe Drejtoria e Planifikimit të Territorit nuk kanë ndërmarrë veprimet e nevojshme për përfundimin e procedurave dhe zhbllokimin e tyre.
Mospërputhje prej 43 milionë lekësh në pasqyrat financiare
Probleme janë evidentuar edhe në raportimin financiar të bashkisë. Nga krahasimi i pasqyrave financiare me të dhënat e Sistemit Informatik Financiar të Qeverisë janë konstatuar mospërputhje në shtatë llogari kontabël, me një diferencë prej 43 081 918 lekësh.
Auditimi ka zbuluar gjithashtu se 5 749 266 lekë shpenzime për investime në objekte në pronësi të komunitetit janë regjistruar gabimisht si aktive të bashkisë.
Ndërkohë, gjashtë objekte me vlerë 932 669 760 lekë, që i përkasin Shoqërisë Rajonale Ujësjellës-Kanalizime Gjirokastër, vijojnë të evidentohen në llogaritë e Bashkisë Dropull, pa u kryer transferimi përkatës.
KLSH: Masat disiplinore nuk u zbatuan, kryetari nuk i konsideroi të arsyeshme
Një prej konstatimeve më të rëndësishme të raportit lidhet me moszbatimin e rekomandimeve të mëparshme të KLSH-së.
Nga shtatë masa organizative të pranuara në kuadër të auditimit financiar, gjashtë rezultojnë të zbatuara pjesërisht dhe një e pazbatuar. Por edhe më problematik rezulton zbatimi i masave disiplinore.
KLSH kishte rekomanduar që kryetari i bashkisë t’i kërkonte Komisionit Disiplinor të shqyrtonte përgjegjësitë e punonjësve të konstatuar me shkelje dhe të merrte masat përkatëse.
Në shpjegimet e tij, kryetari i bashkisë ka deklaruar se nuk e ka parë të arsyeshme dhënien e masave disiplinore për të gjithë punonjësit e evidentuar me përgjegjësi, duke u dhënë mundësinë të përmirësonin punën në vazhdim.
KLSH e ka konsideruar këtë rekomandim të pranuar, por të pazbatuar. Për rrjedhojë, nuk janë kryer as njoftimet pranë Departamentit të Administratës Publike dhe Komisionerit për Mbikëqyrjen e Shërbimit Civil.
Në përmbledhjen e raportit evidentohen dy rekomandime disiplinore, që lidhen me 21 persona, të cilat rezultojnë të pazbatuara në këtë pjesë të vlerësimit.
Gjashtë funksione pa financim, buxheti realizohet vetëm 69.7%
KLSH ka konstatuar gjithashtu mangësi në planifikimin e buxhetit. Nga 20 programet buxhetore, gjashtë funksione ose nënfunksione nuk janë marrë në konsideratë nga bashkia dhe nuk janë parashikuar fonde për to.
Për vitin 2025, nga buxheti i rishikuar prej 372.7 milionë lekësh për shpenzimet, janë realizuar vetëm 259.8 milionë lekë, ose 69.7%.
Audituesit vlerësojnë se planifikimi i shpenzimeve pa u mbështetur në parashikime reale të të ardhurave dhe mosrishikimi i buxhetit gjatë vitit kanë sjellë mungesa në plotësimin e nevojave të komunitetit.
Në përfundim, KLSH i kërkon Bashkisë Dropull të marrë masa për përmirësimin e menaxhimit financiar, arkëtimin e detyrimeve, administrimin e pronave publike dhe forcimin e kontrollit të brendshëm.
Raporti kërkon gjithashtu që kryetari i bashkisë të nisë procedurat për shqyrtimin e përgjegjësive disiplinore të punonjësve të evidentuar me shkelje.
Auditimi përcakton përgjegjësi për kryetarin e bashkisë, Drejtorinë e Financës dhe Buxhetit, Drejtorinë e të Ardhurave dhe strukturat e tjera përkatëse. Megjithatë, raporti nuk publikon një listë të plotë me emrat e punonjësve përgjegjës për secilën prej shkeljeve.
