Autoritetet spanjolle kanë kërkuar 22 vite burg për autorin që vrau të riun shqiptar Artjol Ramaj tre vite më parë. Ramaj u vra nga një 52-vjeçar me të cilin jetonte në një shtëpi teksa së bashku kujdeseshin për një plantacion marijuane.
Vrasja e vlonjatit ndodhi pas një konflikti për vetëm 5 euro, që degradoi deri në përleshje fizike mes tij dhe 52 vjeçarit të dyshuar si vrasësi i tij. Përplasje që u mbyll në mënyrë fatale për shqiptarin nga Vlora.
El Pais i ka dedikuar një artikull zbardhjes së vdekjes së shqiptarit, për të cilin shkruan se trupi i tij u copëtua dhe u shpërnda në një zonë të pyllëzuar pranë banesës, ndërsa eshtrat e tij u zbuluan rreth një muaj e gjysmë më vonë nga një person që po shëtiste qenin.
Natën e 2 marsit 2023, i riu shqiptar Artjol Ramaj u zhduk pa lënë gjurmë. Që nga fundi i vitit 2022, ai jetonte me një burrë tjetër, 52-vjeçarin I. B., i njohur me nofkën El Seco, në një shtëpi dykatëshe të bashkëngjitur me një tjetër, në një kompleks banimi në Riudarenes, Girona, ku të dy mirëmbanin dhe ruanin një plantacion marijuane.
Disa ditë më vonë, një i njohur i të riut denoncoi zhdukjen e tij në policinë katalanase, Mossos d’Esquadra. Ai ishte shqetësuar nga mungesa e informacionit për fatin e shqiptarit, por edhe nga ato që i riu u kishte treguar më parë të njohurve të tij. Sipas këtyre rrëfimeve, marrëdhënia mes tij dhe bashkëjetuesit ishte përkeqësuar dhe të dy kishin pasur disa përleshje.
Kur policët mbërritën në banesë, arrestuan 52-vjeçarin, pronarin e pronës, nën akuzën për një vepër penale kundër shëndetit publik. Ata çmontuan gjithashtu plantacionin e marijuanës, por nuk gjetën asnjë gjurmë të të riut të zhdukur.
Prokuroria kërkon mbi 22 vite burg
Pas disa vitesh hetime, një gjykatë në Santa Coloma de Farners ka vendosur të mbyllë fazën hetimore dhe ta kalojë çështjen për gjykim me juri. Prokuroria kërkon 22 vite e 5 muaj burg për të akuzuarin, ndërsa dy palët akuzuese që përfaqësojnë, nga njëra anë, nënën dhe motrën e viktimës dhe, nga ana tjetër, babanë e tij, kërkojnë një dënim tre vite më të gjatë.
Gjykatësi dyshon se El Seco e vrau të riun pas një tjetër grindjeje, natën e zhdukjes së tij, pasi e akuzonte se i kishte marrë 5 euro që i përkisnin. Sipas dyshimeve, 52-vjeçari e sulmoi shqiptarin ndërsa ai qëndronte i shtrirë në shtrat, i papërgatitur për sulmin dhe pa mundësi për t’u mbrojtur. Hetuesit dyshojnë se agresori ushtroi dhunë të rëndë ndaj tij, duke i shkaktuar vdekjen.
Eshtrat u gjetën në pyll, dyshohet se kafshët e egra e hëngrën trupin
Përveç akuzës për vrasje, palët akuzuese i atribuojnë 52-vjeçarit edhe veprën penale të përdhosjes së kufomës, për të cilën kërkojnë 5 muaj burg. Trupi i pajetë i Artjol Ramajt nuk u gjet kurrë i plotë. Hetuesit zbuluan vetëm mbetjet e tij mortore, në formën e një numri të madh eshtrash të shpërndara në një hapësirë që përdorej si vendgrumbullim mbeturinash, në një zonë pyjore pranë banesës ku dyshohet se ai u sulmua për vdekje, në kompleksin e banimit Can Fornaca.
Mbetjet mortore u zbuluan më 17 prill 2023, rreth një muaj e gjysmë pas vrasjes së dyshuar, nga një burrë që po shëtiste qenin e tij. Gjykatësi hetues dyshon se i akuzuari e dinte se çfarë po bënte kur e transportoi trupin në atë vend. Sipas hetimit, derrat e egër dhe kafshët e familjes së qenve që frekuentonin zonën mund ta shkatërrnin trupin dhe ta bënin të pamundur identifikimin e tij.
“Gjendja në të cilën ndodheshin mbetjet kockore, me skeletizim të pjesshëm, shpërndarje anatomike dhe ndryshime tafonomike të shkaktuara nga kafshët që ushqehen me kërma, nuk lejoi përcaktimin e numrit të plagëve që i akuzuari i kishte shkaktuar viktimës”, shpjegon prokuroria.
Ekspertët arritën të identifikonin vetëm një traumë në kokë dhe tru, si pasojë e sulmit, një nga dëmtimet që, sipas palëve akuzuese, i shkaktoi vdekjen të riut që ruante plantacionin. Pranë mbetjeve mortore u gjet edhe një thikë.
Gjurmë gjaku në dhomën e gjumit, furgon dhe lavatriçe
Në të njëjtin vend, hetuesit gjetën edhe sende të tjera që i përkisnin të riut shqiptar. Mes tyre ndodheshin një peshqir, një këllëf jorgani, një jastëk dhe një qilim, të cilët ishin njollosur me gjak pas sulmit. Policia zbuloi gjithashtu gjurmë gjaku në dhomën e gjumit të viktimës, të cilat, sipas dyshimeve, El Seco kishte tentuar t’i pastronte për të zhdukur provat.
Gjurmë gjaku u konstatuan edhe në furgonin që dyshohet se u përdor për transportimin e kufomës drejt vendit ku kafshët e egra mund të zhduknin gjurmët. Madje, gjatë kontrollit, policët gjetën brenda lavatriçes edhe një palë pantallona të të akuzuarit, të njollosura gjithashtu me gjak.
I akuzuari mohon vrasjen: Provat mbështeten vetëm në dyshime
Megjithatë, El Seco këmbëngul se është i pafajshëm. Mbrojtja e tij argumenton se akuza mbështetet pothuajse tërësisht në një lidhje rrethanash dhe indiciesh, të cilat i cilëson si “dyshime, probabilitete ose rindërtime thjesht të mundshme”.
Në dokumentin me të cilin kërkon pushimin e çështjes, avokatja e të akuzuarit argumenton se përfundimet e hetuesve ndërtohen në masë të madhe mbi njëri-tjetrin, pa prova të drejtpërdrejta që të vërtetojnë përgjegjësinë e klientit të saj.
“Në rastin konkret, përfundimet ndërtohen në masë të madhe mbi njëri-tjetrin, pasi supozohet se vdekja ka ndodhur në dhomë sepse aty ka gjak; vdekja i atribuohet të akuzuarit sepse ai bashkëjetonte me viktimën; pantallonat interpretohen si provë e sulmit sepse merret si e mirëqenë që i akuzuari ishte agresori; gjaku në automjet interpretohet si provë e transportimit të trupit sepse supozohet se i akuzuari e kishte vrarë viktimën; dhe transportimi i dyshekut dhe i shtresave të shtratit i atribuohet të akuzuarit sepse, sërish, merret si e mirëqenë se ishte ai që kreu vrasjen”, thuhet në argumentimin e mbrojtjes./El Pais
