Ekipi i Flamurtarit ka humbur përballë Luftëtarit me rezultatin 0-1. Golin vendimtar të këtij takimi e ka realizuar Shkurtaj, që i dhuroi 3 pikë të rëndësishme bluzinjve. Tashmë Luftëtari është akoma më afër zonës europiane. Në një intervistë për “Supersport”, Hasan Lika është shprehur se ekipi i tij ka përfituar nga mungesat që kishte ekipi kundërshtar.
“Jemi përgatitur në mënyrën e duhur por kemi ditur të shfyrytëzojmë edhe mungesat e kundërshtarit. Në ditën e sotme kemi përfituar nga këto mungesa të shumëta që kishte Flamurtari, megjithëse nëse mund të tregoheshim me të qetë, atëherë gjërat mund të kishin shkuar edhe më mirë.
Nuk mund të ishim rival për titull kampion. Nuk duhet të harrojmë që Luftëtarit i janë larguar 4-5 lojtarë nga ekipi i vjetshëm. Unë e kam theksuar edhe kur ne luanim mirë dhe nuk vinin rezultatet, se do të largoheshim nga zona e ftohtë në të cilën gjendeshim. Tani jemi më larg kësaj zone.
Jam i kënaqur për rezultatin, por kërkoja një performancë më të mirë nga disa futbollistë. Problemi që kemi në Gjirokastër është humbja e rasteve. Ndikohemi nga dëshira për të fituar takimin dhe humbin shumë raste. Një skuadër që krijon do të shënojë, por duhet të jemi më të kujdesshëm përpara portës. Shkurtaj e zgjidhi në mënyrën e duhur pasimin e dhënë nga Bregu. Nuk e bazojmë lojën vetëm te kundërsulmet.
Nuk është e lehtë të mbështetësh sulmuesit tanë dhe futbollistët e tjerë shpeshherë ankohen se nuk i mbështesin dot për shkak të shpejtësisë që kanë lojtarët. Unë dua të falenderojë Ramadanin sepse është sforcuar në ndeshjen e sotme. Dua të them se nuk fiton asnjëherë individi por skuadra. Ne mundohemi në çdo ndeshje që të ngjitemi sa më lartë dhe duhet të vazhdojmë në këtë mënyrë sepse situatat në futboll ndryshojnë gjithmonë”, është shprehur Hasan Lika.
