Për aksidentin e ndodhur dje në Urën e Kardhiqit, seksioni për hetimin e ngjarjeve rrugore në policinë e Gjirokastrës bën me faj 66-vjeçarin Sali Ngjelina, i cili ishte duke drejtuar zetorin. Policia thotë se ka referuar në Prokurorinë e Gjirokastrës materialet hetimore në ngarkim të 64-vjeçarit, i cili aktualisht ndodhet i shtruar në spital në kryeqytet pasi gjendja e tij shëndetësore është e rëndë.
“Më datë 23.03.2018, u referuan materialet Prokurorisë pranë Gjykatës Shkallës Parë Gjirokastër, për shtetasin S.N, vjeç 66, banues në fshatin Picar, pasi në rrugën nacionale, tek “Ura e Kardhiqit”, duke drejtuar mjetin bujqësor traktor me goma, është përplasur me mjetin tip “Volksvagen” të drejtuar nga shtetasi E.GJ vjeç 21, banues në Kavajë, për pasojë ka humbur jetën shtetasi K.N vjeç 25, banues në Picar dhe janë dëmtuar shtetasit S.N, H.N dhe M.GJ banues në fshatin Picar e Kavajë, të cilët ndodhen në spital nën kujdesin e mjekëve”, sqaron policia e Gjirokastrës përmes një njoftimi.
Nga aksidenti tragjik humbi jetën Klajdi Ngjelina. Ai po udhëtonte me zetor bashkë me prindërit, për të blerë ushqime në dyqanet e zonës. Por mjeti i tyre i ka ndërprerë rrugën makinës që drejtohej nga 21-vjeçari dhe përplasja ka qenë fatale për ta. ©ArgjiroLajm.net
