Kryetarët e 14 bashkive në takimin e zhvilluar me ambasadoren e BE-së në Tiranë, Romana Vlahutin, kanë folur lidhur me problemet që kanë në qeverisjen lokale. Në fokus të takimit kanë qenë kompetencat e kufizuara që kanë bashkitë në territorin e tyre.
Kryetarja e Bashkisë së Gjirokastrës, Zamira Rami, ka thënë se në Gjirokastër, bashkia e ka të pamundur të kontrollojë territorin apo ta monitorojë atë lidhur me kultivimin e hashashit, pasi ka kompetenca të kufizuara.
“Unë nuk kam të drejtë të marr vendime për një aktivitet që mund të kryhet në shtratin e lumit. Gjirokastra ka 7-shim të sipërfaqes së saj. Ka 6 ish-komuna që i janë bashkuar, dhe sigurisht me një polici bashkiake me 12-13 vetë është e pamundur që të arrish të kontrollosh cdo cep të territorit.
Padyshim që edhe në takimet që janë bërë me kryetarët e fshatrave, edhe policinë e qarkut të Gjirokastrës, gjithësecili ka marrë përgjegjësitë e veta, është e pamundur që puna të lihet vetëm në dorën e një kryetari fshati, sepse nuk kemi burimet njerëzore të duhura për t’a menaxhuar këtë krizë.
Kështu që, ne e kemi të pamundur, si dhe inspektorët që kemi pranë agjencive, të bujqësisë dhe të mjedisit, dhe nuk arrijmë dot të jemi konkret në informacionin që duhet të japim. Ndërkohë, ne nuk i vendosim dot përgjegjësi ligjore një kryetari fshati, për kodra apo male që janë afër atij fshati.”-ka thënë Rami.
