Luftëtari nuk mundi t’i merrte dot pikët e plota në ndeshjen me Teutën, teksa skuadra e drejtuar nga Hasan Lika nuk shënoi dot, edhe pse pati raste të pastra me Shkurtajn, Bregun dhe Abazajn. Gjithsesi, duke parë mundësinë që humbi në fund Latif, bluzinjtë duhet t’i kënaqen pikës së marrë. Gara për Evropën do të jetë e ashpër deri në mbyllje të kampionatit, ndaj edhe në Gjirokastër mendojnë se mund ta realizojnë objektivin sezonal, pasi vendi i tretë është pranë, por edhe i katërti mund të të japë një “biletë” për Europën.
Ndeshja e radhës luhet me Laçin në shtëpi dhe është një finale për Europën. Kurbinasit janë mbi Luftëtarin në renditje dhe fazën e dytë ia kanë dalë të marrin pikë me bluzinjtë në “qytetin e gurtë”. Parashikohet një ndeshje shumë e fortë, ndërkohë që për trajnerin Hasan Lika nuk do të jetë i gatshëm një nga lojtarët kryesorë të formacionit. Shkodrani Behar Ramadani u ndëshkua në fraksionin e dytë të lojës me karton të verdhë dhe është i pezulluar për javën e ardhshme, ndaj edhe stafi teknik duhet të mendojë për zgjidhjen. Alternativat nuk mungojnë gjithsesi, ndaj edhe në Gjirokastër janë të qetë.
Por pasoja pati edhe për Teutën pas takimit me Luftëtarin. Mbrojtësi Silvester Shkalla kreu një faull të detyruar në pjesën e dytë dhe u ndëshkua me karton të verdhë, që për të është i teti deri në këtë moment të kampionatit dhe e penalizon për “finalen” që Teuta ka javën e ardhshme me Vllazninë në stadiumin “Niko Dovana” të qytetit të Durrësit. Begeja në vend të tij me shumë mundësi do të aktivizojë mbrojtësin Amir Bilali, i ardhur në janar nga skuadra e Rabotnicckit në Maqedoni. Ish-lojtari i Bylisit fillimisht luajti si titullar, por së fundmi janë preferuar Hrkac dhe Shkalla nga stafi teknik.