Në Gjirokastër ka ende disa njerëz që ruajnë nostalgji për ish- diktatorin Enver Hoxha. I kemi parë shpesh të mblidhen në përvjetore te shtëpia e tij e lindjes apo në varrezat e dëshmorëve, duke artikuluar fraza plot pasion për komunizmin dhe kohën kur ai drejtoi Shqipërinë me dorë të hekurt. Te tjerë e shprehin zellin për udhëheqësin e PPSH-së duke shkruar emrin e tij nëpër mure në ambiente publike të Gjirokastrës. Një prej këtyre vendeve është edhe stadiumi ‘Gjirokastra’, ku në një fasadë të tij gjendet mbishkrimi ‘Enver’. Por problemi nuk është me ata të cilët ushqejnë simpati dhe vlerësim për ish-diktatorin dhe që shkruajnë emrin e tij në ambiente publike. Çfarë po bën Bashkia Gjirokastër, për të pastruar mbishkrime të tilla, të cilat janë mëse të dukshme për sytë e të gjithëve? Kujt po i bëjnë nder mbishkrime të tilla në mes të qytetit? Jo vetëm që janë të shëmtuara estetikisht, por edhe nga pikëpamja simbolike janë të rrezikshme. ArgjiroLajm.net ka denoncuar më herët edhe mbishkrimet në disa kosha mbeturinash që gjenden në rrugët kryesore të Gjirokastrës. Aty shikon emrat e kryeministrit Edi Rama dhe disa deputetëve të tjerë. Si për çudi, askush nga Bashkia Gjirokastër nuk është kujtuar t’i pastrojë.
© ArgjiroLajm.net
