Tepelena ka çelur sot zyrtarisht sezonin e vet turistik, me aktivitete të shumta të organizuara në kuadër të Javës së Ali Pashës. Organizimet e shtrira gjatë gjithë ditës së sotme kanë nisur me disa sesione shkencore për figurën e Ali Pashës ku kanë referuar emra të njohur të historisë, kulturës dhe trashëgimisë. Për ministren Kumbaro është hedhur themeli i një tradite që do të kthehet në të përvitshme dhe që synon promovimin e kulturës, traditës dhe trashëgimisë në portën hyrëse të Jugut. I pranishëm ishte gjithashtu edhe deputeti Bledi Çuçi.
Panairi i artizanatit, kulinarisë dhe traditës ka mbledhur në shesh artizanë jo vetëm nga treva të ndryshme të Tepelenës, por edhe miq të largët. Një kënd i ri lojërash do të jetë tashmë hapësira e argëtimit për fëmijët e Tepelenës. Kjo është hera e parë që Tepelena organizon çeljen zyrtare të sezonit të vet turistik. Vitin e fundit qyteti jugor ka shënuar rritje të numrit të turistëve që vizitojnë këtë zonë. Një vit më parë Tepelena numëroi rreth 10 mijë tursitë ditorë, ndërsa po punohet për shtimin e njësive akomoduese dhe një turizëm të qëndrueshëm.
