Vjollca Koko, këshilltarja e LSI-së që sot mori drejtimin e Këshillit Bashkiak Gjirokastër me mbështetjen e grupimit të PS-së dhe këshilltares tjetër të LSI-së, Monda Kllapi, ka reaguar as zgjedhjes së saj në krye të ‘parlamentit’ të qytetit. Njësoj sikundër në deklaratën e LSI-së mungoi një urim për Kokon, madje u theksua se zgjedhja e saj është e dyshimtë nga ana ligjore, edhe Vjollca Koko as nuk e përmend LSI-në në reagimin e saj. Kjo të lë të kuptosh se praktikisht ajo është shkëputur prej grupit të LSI-së. Më poshtë reagimi i plotë i saj.
Në mbledhjen e sotme të Këshillit Bashkiak Gjirokastër, pranova propozimin për të qenë Kryetare e këtij Këshilli.
E pranova propozimin me dëshirën për të dhënë modelin e mirë dhe për të kontribuar në respektimin e legjislacionit për të mirën e komunitetit gjirokastrit. Mbrojtja e të drejtave të personave me aftësi të kufizuara për lëvizje të lirë dhe shërbime në komunitet ishin qëllimet e mia, ku mora iniciativën për të hyrë në Këshillin Bashkiak.
Boshllëku midis të drejtave me legjislacion dhe të drejtave në realitet ishin nxitja kryesore. Sigurisht që sot jemi larg synimit kryesor, por problemet e aftësisë së kufizuar janë përmendur e diskutuar shumë herë në këtë periudhë, përtej Këshillit Bashkiak Gjirokastër. Me të njëjtin përkushtim kam trajtuar problemet e shtresës të shoqërisë që trajtohet me ndihmën ekonomike. Me të njëjtin përkushtim dhe paanshmëri do përpiqem të drejtoj Këshillin Bashkiak Gjirokastër. I kërkoj ndjesë shokëve të mi me Sklerozë Multiple që sot (ditën Ndërkombëtare të Sklerozës Multiple) nuk mundëm të organizonim takimin mes nesh. Bashkarisht do gjejmë ditën e përshtatshme për tu takuar.
Me dashuri,
Vjollca.
