Për herë të parë Këshilli Bashkiak i Gjirokastrës do të drejtohet nga një njeri me aftësi të kufizuara. Mjekja Vjollca Koko, këshilltare e LSI-së, mori sot mbështetjen e grupimit të PS-së dhe të koleges tjetër të LSI-së, Monda Kllapi. Pas këtij zhvillimi LSI Gjirokastër bëri një deklaratë, ku ndër të tjera ra në sy mungesa e një urimi, qoftë dhe formalisht për Vjollca Kokon. Jo vetëm kaq, por LSI ngre dyshime se ajo është zgjedhur në mënyrë jo legjitime. Pra, jemi në kushtet kur LSI Gjirokastër ‘vajton’ për shkarkimin i Mimoza Çomos, këshilltare e PD-së, ndërsa për këshilltaren e vet, haptaz fare shpërfaq gjithë cinizmin e mundshëm duke i plasur në ‘fytyrë’ pretendimin se ajo është zgjedhur në shkelje të ligjit. Sigurisht që ligji është i ftohtë dhe s’duhet ngatërruar me emocionet. Nëse ka shkelje ligjore, me këtë të merren organet kompentente një moment të dytë. Por së paku LSI Gjirokastër duhet ta kishte kursyer cinizmin me Vjollca Kokon në këtë rast dhe formalisht t’i uronte suksese në funksionin që mori sepse është një këshilltare nga radhët e veta. Sidomos kur jemi në kushtet që kemi përballë një person me aftësi të kufizuara, integrimi i të cilëve në shoqëri është një sfidë e madhe.
Po kështu jemi në kushtet kur LSI e përforcoi në deklaratë se Koko mbetet në grupin e saj. Pra, edhe të thuash që ajo mbetet në LSI, edhe të mos i urosh suksese për funksionin, edhe t’i kujtosh se u zgjodh në mënyrë jo legjitime, në mos cinizëm është një injorancë e madhe. LSI Gjirokastër duhet ta ndajë mendjen me Vjollca Kokon dhe Monda Kllapin, nuk mund të luajë me dy porta dhe ta kamuflojë atë që ndodhi sot si gjoja demokraci e brendshme në parti. Plasi demokracia në LSI apo në Këshillin Bashkiak të Gjirokastrës. Dokrra! Politikisht Vjollca Koko dhe Monda Kllapi kanë thyer vendimin e grupit të tyre, kanë rrëzuar zgjedhjen e Mimoza Çomos që u bë me vendim politik të LSI-së dhe PD-së. Prandaj LSI është në të drejtën e vet t’i përjashtojë nga grupi.
Partitë sigurisht që duhet të kenë demokraci të brendshme, por nuk janë han pa porta. LSI mund ta shesë si qëndrim personal dhe gjoja shenjë e demokracisë së brendshme nëse Vjollca Koko dhe Monda Kllapi do të kishin votuar ndryshe për një çështje tjetër të rëndomtë në Këshillin Bashkiak, por jo në këtë rast kur kemi të bëjmë me shkarkimin e kreut të Këshillit dhe zgjedhjen e dikujt tjetër. ‘Shëndoshje’ e demokracisë dhe përparim në integrimin e personave me aftësi të kufizuara është zgjedhja e Vjollca Kokos në krye të Këshillit Bashkiak Gjirokastër.
Kjo i bën nder të gjithëve, pavarësisht se mjekja e njohur që përfaqëson LSI-në, politikisht ka thyer vendimin partisë së saj dhe LSI duhet të mbajë qëndrim për këtë. Nëse nuk mban qëndrim LSI, duhet të mbajë qëndrim vetë Vjollca Koko. Të deklarojë publikisht raportin e saj me LSI-në. Sepse nuk bën sens që të vazhdojë të jetë pjesë e LSI-së kur kjo i përplas në ‘fytyrë’ pretendimin se u zgjodh në krye të Këshillit në shkelje të ligjit. Moralisht nuk mund të vazhdohet në këtë mënyrë.Është një situatë e ngjashme me një çift bashkëshortësh që rrinë bashkë vetëm për hir të fëmijëve, por nuk e shohin dot me sy njëri-tjetrin dhe secili është për hesap të vet….
© ArgjiroLajm.net
