Atë që s’e bëri LSI për Vjollca Kokon, po e bën PS Gjirokastër. Përmes një mesazhi në Facebook, kryetari Bledar Kaçi i shpreh urimet këshilltares së LSI-së, e cila sot u zgjodh në krye të Këshillit Bashkiak. Urimi merr më shumë kuptim prej faktit se LSI Gjirokastër në deklaratën që bëri sot pasdite, jo vetëm që nuk e uroi këshilltaren e vet, por ngriti dyshime se Vjollca Koko ishte zgjedhur në mënyrë jo të ligjshme. Ja çfarë shkruan Kaçi në faqen e PS Gjirokastër.
Në mbledhjen e sotme të Këshillit Bashkiak Gjirokastër ka një ngjarje që duhet ta përshëndesim të gjithë. Për herë të parë ky institucion që përfaqëson parlamentin e qytetit, do të drejtohet nga një grua me aftësi të kufizuara. Ndonëse me mjeken Vjollca Koko na ndajnë qëndrime të ndryshme politike, kjo s’më pengon ta shikoj zgjedhjen e saj në krye të Këshillit Bashkiak si një lajm të mirë dhe t’i uroj suksese në funksionin e ri që sapo ka marrë. Natyrisht që s’jam duke thënë se Vjollca Koko meriton vlerësim sepse fati nuk i ka buzëqeshur, duke e lënë mbi një karrige me rrota. Por përveç se një person me aftësi të kufizuara, para së gjithash ajo është një zonjë dhe mjeke shumë e mirë. Nga ana tjetër Vjollca Koko ka forcën e shembullit të një njeriu që nuk është dorëzuar për asnjë çast dhe është vlerë për të gjithë ne që krahas kontributit në shëndetësi e kemi edhe në krye të Këshillit Bashkiak. Urime dhe suksese Vjollca!
