Kryetarja e LSI-së Monika Kryemadhi bëri sot një thirrje për socialistët në Kuvend. Ajo tha se ata duhet të largohen nga kryeministri Edi Rama sa më parë pasi në të kundërt historia e kësaj partie do të mbyllet këtë vit. Sipas saj, Rama ka blerë PS 11 vite më parë dhe e ka tjetërsuar atë në parti të krimit e drogës dhe mjerimit të shqiptarëve.
“Sot parlamenti është i qetë, sepse të gjithë përfaqësuesit dhe ambasadorët e krimit kanë dalë jashtë. Por, misioni ynë nuk është vetëm këtu, por të sensibilizojmë shqiptarët për të kundërshtuar çdo veprim arbitrar dhe të largojmë Edi Ramën. Vetëm kështu, ai do gjejë qetësinë e shpirtit të trazuar, që nuk e lë të flejë. E vetmja mënyrë e tij është të largohet sa më shpejt, t’i krijojë hapësirë vetes së tij në llumin e vet, që e ka uzurpuar. Unë ju lutem të gjithë socialistëve që të largohen prej tij, sepse ai është element kriminal që bleu PS 11 vite më parë dhe e tjetërsoi në partinë e krimit e trafikut, dhe të mjerimit të shqiptarëve”, tha Kryemadhi.
Ndërkohë një ditë më parë dy këshilltarë të LSI-së në Gjirokastër, Vjollca Koko dhe Monda Kllapi, thyen vendimin e grupit dhe të aleancës me PD-në, duke bashkuar votat me PS-në për të zgjedhur një kryetar të ri në Këshillin Bashkiak.
© ArgjiroLajm.net
