Trajneri slloven, Milosh Kostiç, është prezantuar sot në krye të Luftëtarit nga presidenti i ekipit, Grigor Tavo, pasi nënshkroi kontratën trevjeçare. Ai do ta nisë aventurën me Luftëtarin në Europa League, ku gjirokastritët do të luajnë për herë të parë në historinë e tyre. Kostiç pason në stol Hasan Likën, i cili e drejtoi Luftëtarin me shumë sukses sezonin e fundit. Kushti për trajnerin slloven është që ta mbajë Luftëtarin në treshen e parë të renditjes, duke nisur nga sezoni i ardhshëm. Pra, çdo sezon Luftëtari duhet të jetë në Kupat e Europës. Trajneri slloven do të prezantohet nesër me ekipin e tij të ri, pasi për datën 6 qershor është planifikuar fillimi i stërvitjes.
Me shumë interes pritet që të mësohen emrat e lojtarëve që do të forcojnë Luftëtarin për Kupat e Europës dhe sezonin e ardhshëm. Slloveni 46-vjeçar hodhi firmën në marrëveshjen që e lidh për tre vjet me klubin në Gjirokastër, ndërsa më pas pozoi me presidentin e skuadrës, Grigor Tavo. Kreu i bluzinjve ishte bindur prej kohësh për t’ia besuar Kostic projektin Luftëtari dhe ambiciet janë të mëdha. Mes kushteve të kontratës të firmosur ndërmjet palëve, skuadra ka si objektiv që të mos zbresë më poshtë se vendi i tretë, në të cilin e mbylli kampionatin në edicionin që përfundoi.
© ArgjiroLajm.net
