Sali Berisha paralajmëron se Reforma Territoriale e miratuar me forcën e kartonit nga socialistët ka pak mundësi të zhbëhet.
Gjatë komunikimit të përjavshëm me qytetarët në mediat sociale, pohoi se Selia Blu do të bëjë çdo përpjekje ligjore për ta rrëzuar, por shton se nuk ka besim se do arrihet qëllimi: “PD do të ndjekë të gjitha rrugët ligjore, por paralajmëron të dashur qytetarë, se në narkoshtet rruga ligjore është falsitet. Se gjykatat janë notere të narkoqeverisë. Se referendumet, narkoqeveria nuk mund t’i lejojë kurrë. Megjithatë ne do përdorim çdo mjet ligjor kundër këtij akti”.
Në një kohë kur Reforma Territoriale do të nisë zbatimin, Berisha ka nisur të mendojë edhe për zgjedhjet e 2027-ës dhe premton emrat e kandidatëve, shkruan A2.
“Nuk do i lëmë për çastet e fundit. Do fillojmë shumë shpejt publikimin e emrave të tyre”, theksoi kreu demokrat.
Kritikave se opozita nuk bëri aq sa duhet betejë për Reformën Territoriale, Berisha u përgjigjet duke renditur të gjitha veprimet si në Parlament me propozimin për kalimin në 100 bashki, ashtu dhe në protesta: “Ata qytetarë që mendojnë se opozita është palë, u shpreh keqardhjen time më të madhe se i bëjnë një shërbim të turpshëm Edi Ramës”.
Lideri demokrat u pyet edhe për dosjen e SPAK ndaj Vlora Hysenit, ku akuzoi se i përfshirë është edhe Edi Rama.
