Skuadra gjirokastrite ka dy ditë që ka nisur stërvitjen dhe numri i lojtarëve në dispozicion të stafit teknik është mjaft i lartë. Luftëtari ngjan vërtet si një kantier ndërtimi, ku trajneri Kostiç dhe ndihmësit e tij do të testojnë shumë lojtarë të rinj. Janë mbi 10 lojtarët e rinj që kanë shkuar në Gjirokastër për t’i treguar trajnerit slloven se vlejnë. Por tifozët e Luftëtari duan të dinë se kush do të zëvendësojë yjet e larguar nga ekipi, Bregun dhe Abazajn.
Burime pranë klubit gjirokastrite kanë pohuar se në fillim të javës së ardhshme pritet të bëhen përforcimet me lojtarë nga jashtë, të cilët do të kenë cilësinë e duhur për të mbushur boshllëkun e lënë nga Bregu dhe Abazaj. Te Luftëtari mungojnë aktualisht në stërvitje dhe Rroca dhe Jakovljeviç, për shkak dëmtimesh. Për Rrocën ka shpresa se do të jetë gati për ndeshjen e parë në Europa League.
