Mbledhja e aktivit e thirrur me urgjencë nga Partia Demokratike në Gjirokastër nuk solli ndonjë gjë të re, përveç se një lloj transferimi të debatit politik që zhvillohet në Tiranë mes opozitës dhe qeverisë. Në një pjesë të madhe të fjalës së tij, deputeti Tritan Shehu dhe kryetari Roland Bejko, folën për shembjen e Teatrit Kombëtar, si një çështje simbol sipas tyre, të makutërisë dhe korrupsionit qeveritar. Dhe siç bën shpesh në takime të tilla, deputeti Shehu nuk harroi as kësaj radhe të akuzonte Ramën për shkatërrim të marrëdhënieve me Greqinë dhe aludoi se tashmë po i bëhen lëshime palës greke për marrëveshjen me detin, për t’i rivënë këto marrëdhënie.
Në fjalën e deputetit të Gjirokastrës, nuk mungoi as autokritika e tij për PD-në. Ai tha se kjo parti akoma lë shumë për të dëshiruar, si në qendër ashtu edhe nëpër degë, një deklaratë kjo disi e pazakontë dhe që shton në një farë mënyre mosbesimin e madh në radhët e opozitës.
“Ka vetëm një rrugë. Ne duhet të bëhemi magnet për të tërhequr njerëz rreth vetes, për t’u shtuar, për t’u zgjeruar. Lemë shumë për të dëshiruar akoma, edhe në qendër edhe në degë. Duhet të përmirësohemi shumë, të nxjerrim mësim. Ju të na thoni cfarë të përmirësojmë, si do t’i përmirësojmë strukturat, si do të jemi afër njerëzve. Shtatori erdhi”, u shpreh Shehu.
Sipas deputetit të Gjirokastrës në muajin shtator PD do të nisë një aksion politik të gjerë për largimin e qeverisë, ndërsa kryetari Basha po përgatitet për këtë lëvizje të re.
© ArgjiroLajm.net
