Pezullimi pa afat i Xheksonit zgjati pak orë. Luftëtari vendosi ta rikthente mbrojtësin në skuadër, pasi, sipas klubit, braziliani sqaroi mosmarrëveshjet me stafin teknik, lidhur me mosaktivizimin e tij në ndeshjen e kthimit në Europa League ndaj Ventspils.
Gjirokastritët njoftuan se Xhekson do të vazhdojë normalisht stërvitjen dhe do të jetë i gatshëm për ndeshjen e kampionatit, ashtu siç parashikohet në kontratën e lojtarit me klubin, me akordin që vazhdon deri në fund të sezonit të ri.
Pas sheshimit të polemikave me Xhekson, Luftëtari njoftoi se do të vazhdojë lëvizjet në merkato për të përforcuar skuadrën, duke premtuar se afrimet në radhët e bluzinjve do të jenë të shumta.
Në këtë aspekt, gjatë kësaj të marte në Gjirokastër ekipit pritet ti bashkohen në stërvitje dy lojtarë të krahut të majtë me origjinë nga Koreja. Ata do të qëndrojnë disa ditë në provë dhe më pas stafi teknik do të vendosë nëse lojtarët do t’i bashkohen grupit.
Gjithashtu, në ditët në vazhdim, me ekipin do të bashkohen edhe dy lojtarë nga Segunda Division në Spanjë, me klubin i cili synon që nëpërmjet përforcimeve të reja të synojë vendet e larta në renditjen e kampionatit të ri.
