Gjatë vizitës së sotme në Gjirokastër, ku bashkë me studentë të Universitetit “Eqerem Cabej” shkoi në fshatin Dhoksat në kuadër të fushatës “Shqipëria pa armë”, ministri i Brendshëm, Saimir Tahiri, iu përgjigj indirekt akuzave të deputetit LSI-së, Vangjel Tavo.
“Shqipëria pa armë është objektivi ynë madhor. Unë jam këtu me studentët, me punonjësit e policisë. Jam këtu me pushtetin vendor, jam këtu me prefektin. Është i ftuar Vangjel Tavo dhe kushdo tjetër të na bashkohet. Ky nuk është objektiv jo i imi por është objektiv i yni, i shoqërisë në tërësi. Dhe besoj kjo është mënyra e vetme për të bashkuar energji dhe për të bërë një Shqipëri më të mirë”, tha Tahiri pas pyetjes nga gazetarët.
Javën e kaluar deputeti Vangjel Tavo sulmoi Policinë e Shtetit si të lidhur me kultivuesit e kanabisit, madje u shpreh se i kishte kërkuar Tahirit largimin e drejtuesve të saj nga jugu i vendit. Tavo nuk i ndali sulmet ndaj policisë as në mediat greke. Ai përsëriti akuzat dhe në një intervistë për televizionin Skai.
Sulmet e Tavos ishin të koordinuara me sulme të ngjashme që edhe eksponentë të tjerë të LSI-së bënë ndaj Policisë së Shtetit dhe ministrit Tahiri. Situata duket sikur u qetësua pas shkarkimit të Ylli Manjanit./ArgjiroLajm.net
