Protesta në ditën e 56-të të saj ka mbledhur sërish një numër të madh qytetarësh para Kryeministrisë, ku kërkohet largimi i qeverisë, kryeministrit Edi Rama dhe ndryshimi i sistemit të vjetër politik.
Aktivisti Edison Lika njoftoi nga podiumi i protestës se qytetarët do të jenë përsëri mëngjesin e së hënës para Parlamentit, njësoj si të enjten, duke paralajmëruar vijimin e tubimeve.
Sipas Likës, deputetët e qeverisë kanë ndryshuar datën e seancës parlamentare.
“Në fillim seanca ishte parashikuar për në datën 30 korrik, por ata e ndryshuan për në datën 27, të hënën. Ne u themi siç ia bëmë që në mëngjes, ne përsëri aty do jemi”, tha Lika.
Më tej, aktivisti ftoi në podium edhe një tjetër protestues, i cili sipas tij u dhunua gjatë protestës së së enjtes para Parlamentit.
“Ka ardhur nga Britania e Madhe, ia dogjën trupin krejt në protestën e kaluar, por flamurin e mbajti në krah. Ja kështu e sulmojmë ne Parlamentin, me flamur”, tha ai.
