Prefekti i qarkut Gjirokastër Astrit Aliaj i ka shkuar sot në zyrë drejtorit të Autoritetit Kombëtar të Ushqimit për qarkun Gjirokastër, Beso Brahimi. Në takim është folur për luftën kundër informalitetit dhe parandalimit të konsumimit të ushqimeve jashtë standarteve. Sipas njoftimit të shpërndarë për mediat nga Prefektura Gjirokastër, kreu i AKU-së i ka parashtruar prefektit disa mungesa në logjistikë, si dhe i është ankuar për mungesë bashkëpunimi nga Dogana në Kakavijë.
“Mungesën e infrastrukturës mbështetëse për proçedurën e inspektimit si automjete për transportin e trupës inspektuese, automjete frigoriferike për transportin e produkteve të bllokuara dhe pajisje të posaçme për marrjen e mostrave. Mungesën e pajisjeve laboratorike për kryerjen analizës për produkte ushqimore të falsifikuara si mjalt, vaj ulliri, prodhime bulmeti (për shtesa bimore, si vaj palme apo niseshte). Mosgjetjen e bashkëpunimit me Degën e Doganës Kakavije për të kryer kontrolle të përbashkëta mbi automjetet e vogla për mallra kontrabandë. Dhe mungesat në personel pasi numri aktual i inspektorëve aktual nuk arrin të mbulojë në mënyrë efiçente sigurinë ushqimore për qarkun e Gjirokastrës”, thuhet në njoftimin e Prefekturës.
AKU Gjirokastër, njësoj si AKU në qendër, është një institucion që vepron me dy standarde. ArgjiroLajm.net ka denoncuar në të kaluarën se si ky institucion nuk publikon emrat e subjekteve të mëdha që fusin apo tregtojnë në Shqipëri mallra jashtë standardeve. Ndërkohë kur është fjala për subjektet e vogla, AKU jo vetëm zyrtarizon emrat e subjekteve dhe gjobat respektive, por publikon edhe foto. Të humburit në këtë rast janë padyshim konsumatorët. Ne nuk e dimë kush janë këto biznese apo tregtarë të mëdhenj që fusin në Kakavijë 27 ton miell të dyshimtë, apo pula me salmonelë nga Brazili.
© ArgjiroLajm.net
