Me 6,2 milionë turistë dhe 2 miliardë euro të ardhura, viti 2018 pritet të konfirmohet si viti më i suksesshëm në historinë e turizmit shqiptar. Megjithatë, është një tjetër shifër ajo që të mbush me shpresë për të ardhmen e këtij sektori në Shqipëri.
93% e të huajve që kanë vizituar vendin tonë këtë vit shprehen se do t’i rekomandojnë vendin tonë miqve dhe të afërmve të tyre. Të dhënat janë mbledhur nga projekti “Smile Albania”, i cili ka punësuar 1 mijë të rinj, të cilët ofrojnë asistencë për turistët e huaj në të gjithë pikat kufitare të vendit, si dhe në disa prej pikave turistike më të rëndësishme.
Në pyetësorin e plotësuar nga turistët e huaj në momentin e daljes nga Shqipëria, gjithashtu 87% e tyre janë shprehur se kanë ngelur të kënaqur nga përvoja e kaluar në vendin tonë. Gjatë viteve të fundit, autoritetet janë përpjekur shumë të promovojnë turizmin në panairë apo përmes spoteve publicitare dhe shkrimeve të paguara në mediat e huaja.
Megjithatë, rekomandimi i drejtëpërdrejtë prej personave që vijnë në vendin tonë, është pa dyshim reklama më e mirë, e cila ka edhe një efekt të dytë pozitiv, përmirësimin e imazhit të Shqipërisë, në kuadër të procesit të integrimit europian.
Në shtatë muajt e parë të vitit, Shqipëria është vizituar prej 4,4 milionë shtetasve të huaj. Projektimet zyrtare flasin se deri në fund të vitit, Shqipëria do të tërheqë 6,2 milionë turistë, të cilët do të kontribuojnë me 2 miliardë euro për ekonominë kombëtare.
Në krahasim, në vitin 2017, Shqipëria tërhoqi 5,1 milionë turistë, të cilët sollën në vend 1,5 miliardë euro. Një tjetër lajm i mirë i këtij sezoni është se përveç malit dhe detit, turistët po fokusohen gjithmonë e më shumë tek turizmi kulturor dhe ai i aventurës.
Frekuntimi i muzeumeve, kalave dhe siteve arkeologjike është rritur me 65% gjatë këtij viti, ndërsa turizmi i aventurës, ai i kajakëve, zhytjeve, paragliding dhe sporteve të tjera ekstreme ka njohur një rritje prej 30%./Lexo.al
