Tenderi i Këshillit të Qarkut Gjirokastër, për riasfaltimin e rrugës së fshatit Asim Zeneli është mbyllur. Ky institucion njofton se ka lidhur kontratën me firmat fituese më datë 27 gusht 2018. Ndonëse nuk është një tender me vlerë të lartë, çuditërisht janë shpallur fituese dy kompani si bashkim operatorësh ekonomik; ‘Bilibashi’ nga Libohova dhe ‘TEA-D’ nga Gjirokastra, të cilat do të ndajnë me njëra-tjetrën rreth 61 milionë lekë të vjetra pa Tvsh. (73 milionë lekë të vjetra me Tvsh). Nuk bëhet e ditur se cili është afati për përfundimin e punimeve. Në dokumentet e tenderit bie në sy edhe kriteri i ‘çuditshëm’ me të cilin janë skualifikuar 4 kompani të tjera, për të shpallur fituese dy kompanitë e mësipërme. Për këtë çështje ne do të sjellim më shumë detaje gjatë kësaj jave.
ArgjiroLajm.net ka raportuar edhe më herët për këtë tender, si dëshmi e shpërndarjes së pabarabartë të investimeve në qarkun Gjirokastër. Ndonëse ne e ngritëm si shqetësim publik, nuk u tha asnjëherë përse ishte përzgjedhur pikërisht Asim Zeneli, mes shumë fshatrave të tjerë që ka qarku Gjirokastër. Aq më tepër po të kemi parasysh se ky fshat përfitoi rreth një vit më parë edhe nga programi ‘Rilindja Urbane’.
Natyrisht që nuk është mëkat përse riasfaltohet rruga e Asim Zenelit, thjesht nuk u bë asnjëherë e qartë cili ishte kriteri i përzgjedhjes së këtij fshati, në një kohë kur ka plot fshatra të tjerë ku nuk është vënë dorë fare. Në kushtet e mungesës së transparencës, duket se i vetmi kriter për çuarjen e këtij investimi në Asim Zeneli, është thjesht fakti se ky qenka fshati i origjinës së Armand Hilajt, kreut të Këshillit të Qarkut Gjirokastër. Nuk është pak apo jo?! Fundja po nuk bëre rrugën e fshatit tënd, të kujt tjetër mund të bësh. Shqipëri tavolinash…
©ArgjiroLajm.net
