Për herë të parë qeveria shqiptare jep falas tekstet shkollore për nxënësit e klasave fillore, nismë kjo e cila do të shtrihet në vijim edhe në klasat e tjera. Ministrja e Kulturës, Mirela Kumbaro dhe njëkohësisht deputetja e qarkut, zgjodhi shkollën 9-vjeçare të fshatit Nepravishtë në Libohovë, për të dhuruar librat tek nxënësit në prag të nisjes së vitit të ri shkollor.
Kumbaro shoqërohej në këtë takim nga kryebashkiakja Luiza Mandi, si dhe mësuesit e kësaj shkolle, të cilët bashkë me prindërit vlerësuan nismën e qeverisë. Kumbaro tha se ky është vetëm hapi i parë i një procesi transformues që ka nisur në sistemin arsimos parauniversitar. Në vazhdim tekste falas do të përfitojnë edhe nxënësit e klasave të tjera. Por përveçse janë falas, librat me të cilët do të punojnë nxënësit janë sipas modeleve dhe standardeve më të mira ndërkombëtare. Krahas Libohovës, Kumbaro shpërndau libra falas edhe për nxënësit në shkollat e Përmetit.
©ArgjiroLajm.net
