Akuzave të drejtorëve të shkollavë në Gjirokastër për mungesën e investimeve nga ana e bashkisë në prag të këtij viti të ri shkollor, i është bashkuar kreu i DAR Gjirokastër, Lindita Rova. Në një komunikim me mediat gjatë ditës së sotme, ajo tha se ndërhyrjet e Bashkisë Gjirokastër kanë qenë të pamjaftueshme në shkollat e qytetit.
“Ka pasur ndërhyrje të vogla nga Bashkia Gjirokastër, por mendoj që janë të pamjaftueshme duke pasur parasysh gjendjen e institucioneve arsimore. Ka pasur ndërhyrje të konsiderueshme nga bashkitë Libohovë dhe Dropull dhe institucionet arsimore të këtyre dy bashkive janë në gjendje shumë të mirë për të filluar procesin mësimor. Presim më shumë nga Bashkia Gjirokastër”, tha Rova.
Më herët në javët e fundit akuza për Bashkinë Gjirokastër bënë edhe drejtori i shkollës ‘Koto Hoxhi’. Ai tha se bashkia as nuk kishte lyer shkollën, por ishte mjaftuar me ndërhyrje të vogla në tualete. Drejtori i shkollës ‘Naim Frashëri’ ishte shprehur se nga ana e bashkisë thjesht ishin ndërruar disa llamba dhe asgjë më tepër.
© ArgjiroLajm.net
