‘Universiteti “Eqerem Çabej’ në Gjirokastër duhet të bëhet më konkurrues’. Ky ishte mesazhi i ministres së Kulturës dhe deputetes së qarkut, Mirela Kumbaro gjatë një komunikimi që ajo pati me mediat. E pyetur nga gazetarët për numrin e ulët të regjistrimeve, Kumbaro theksoi edhe njëherë se është nevojshme rritja e cilësisë në arsim. Këtu ajo solli në vëmendje vendimin e qeverisë për notën mesatare mbi 7 si kriter për degën e Mësuesisë.
“Unë besoj se cilësia në mësimdhënie nuk është një formalitet, por është një garanci për të ardhmen. Ne kemi nevojë të rrisim cilësinë. Kjo do të thotë që Universiteti ‘Eqrem Çabej’, duhet të rrisë performancën për të qenë konkurrent me universitetet e tjera. Duhet të konkurrojmë vetëm me cilësi. Hapja e programit Master për Turizëm dhe Trashëgimi Kulturore duhet të jenë një pikë e fortë e Universitetit ‘Eqrem Çabej’ sepse tregun e ka të siguruar”, tha Kumbaro.
Ministrja shtoi më tej se universiteti duhet t’i orientojë programet e studimit drejt tregut të punës që është më specifik për Gjirokastrën.
“Nuk duhet të jemi peng i një diplome formale që na ka marrë në qafë në 15 vitet e fundit, por duhet që universiteti të orientohet aty ku Gjirokastra krijon më shumë treg pune, që është turizmi dhe trashëgimia kulturore”, u shpreh ministrja e Kulturës.
Në Universitetin ‘Eqrem Çabej’ gjatë fazës së parë u regjistruan rreth 150 studentë, shifër shumë më e ulët se viti i shkuar. Mbetet për t’u parë se si do të shkojnë regjistrimet në fazën tjetër, ndonëse pritshmëritë nuk janë të larta.
© ArgjiroLajm.net
