Për zgjedhjet lokale të qershorit 2019 një garë interesante pritet të zhillohet edhe në Bashkinë Tepelenë. Kjo më së shumti duke u nisur prej faktit se socialistët do të rikandidojnë aty sërish Tërmet Peçin. Rikonfirmimin e tij e tha edhe vetë kryeministri Edi Rama gjatë takimit që pati në Tepelenë tre muaj më parë në kuadër të turit të llogaridhënies.
Rama do të tentojë të mbajë Tepelenën me Tërmet Peçin, të cilin e ka mbështetur pa rezerva në çdo projekt dhe investim që i ka shkuar kësaj bashkie. Por nëse për socialistët kandidatura e Tërmet Peçit as që nuk diskutohet, pasi konsiderohet çështje e mbyllur, pyetja është kjo: Me kë do ta sfidojë PD-ja kryebashkiakun atipik, i cili ndonëse drejton një bashki relativisht të vogël, është kthyer në një personazh që merr vëmendjen e medias në çdo kohë.
Janë disa kandidatura të Partisë Demokratike, ndonëse ende jemi shumë larg zyrtarizimit. Së pari përflitet Qamil Xhelili, ish-drejtori i burgut të Bënçës. Më tej është Xhafer Meçe, avokatit që në shkurt të këtij viti i dogjën automjetin. Alternativë tjetër është Arben Çulli, ish-kryetari i Këshillit të Qarkut Gjirokastër në kohën e qeverisjes së PD-së. Gjithashtu mes emrave që PD-ja ka si kandidatë të mundshëm janë edhe Veip Çela, Eshref Shehu dhe Ditar Hoda.
Natyrisht që këto janë vetëm 6 emra të mundshëm. Në vjeshtë dhe muajt e ardhshëm do të ketë shumë zhvillime dhe deomos që në skenë priten personazhe të rinj. Lobimi, pazaret dhe aleancat do të ushtrojnë ndikimin e vet derisa të zyrtarohet kandidati i demokratëve për Bashkinë Tepelenë. Të presim!
© ArgjiroLajm.net
