Humbja në Gjirokastër mund të ishte e parashikuar, pasi në futboll mund të ndodhë çdo gjë, por me rezultatin 3-1, është diçka e papranueshme për Teutën, stafin e saj trajnues dhe drejtues të këtij sezoni. Duke parë investimet që janë bërë në lojtarë dhe staf, diçka e tillë nuk ishte e pritshme. Kështu që dy humbje radhazi ndërlikojnë shumë pozitat e “Djemve të Detit” pas javës së pestë të kampionatit.
Për këtë humbje trajneri korçar i durrsakëve ka menduar që dita e diel të mos ishte pushim për të tijtë, duke përcaktuar kështu një lloj ‘gjobe’ ndaj të tijve për zhgënjimin në ndeshjen kundër Luftëtarit. Ata janë stërvitur ditën e djeshme dhe do të vijojnë pa ndaluar deri të premten, duke pritur takimin e javës së gjashtë të kampionatit.
Ndeshja e radhës në Superiore do të luhet të shtunën kundër Skënderbeut, një tjetër takim i vështirë për trajnerin Shkëmbi, i cili duhet patjetër të marrë tri pikët dhe të kthejë ekipin në normalitet. Për vetë faktin se korçarët janë ende skuadra që nuk njohin humbje në kampionat, Teuta do ta ketë mjaft të vështirë për t’i mundur.
