Çati prej llamarine e dërrasa, mure të zaptuara nga lagështia e myku, porta pa dyer, e mungesë infrastrukture dhe baze materiale didaktike, janë ato që të ofrohen në shkollën fillore “Së bashku” në Gjirokastër.
Në këto kushte e kanë nisur këtë vit të ri shkollor, rreth 90 nxënësit e shkollës “Sëbashku” në Gjirokastër. Gjendja e rrënuar e godinës, lagështi, myku dhe kushtet e papërshtatshme për zhvillimin e mësimit kanë bërë që Inspektorati Shëndetësor të urdhërojë mbylljen e kësaj shkolle, por deri tani nuk është marrë asnjë masë për ndryshimin e situatës dhe zbatimin e këtij urdhri.
Arben Rexha, nëndrejtor i shkollës, thotë se kjo godinë nuk ka njohur asnjëherë restaurim prej kohës së ndërtimit, dhe janë vetë mësueset që kujdesen për mirëmbajtjen e saj.
Godina e ndërtuar rreth 20 vite më parë nga shoqatat humanitare, u shndërrua në shkollën e vetme të ciklit të ulët fillor, ku sot funksionojnë 5 klasa, ndërsa pjesa më e madhe e nxënësve janë të komunitetit rom. Në këtë vit të ri shkollor Bashkia Gjirokastër nuk bëri asnjë investim në shkolla, me argumentin se investimet e një viti më parë mbulonin një periudhë dyvjeçare.
