Shefi i policisë në Patos të Fierit është arrestuar ditën e djeshme pasi duke udhëtuar me makinën e tij përplasi tre makina të tjera, por fatmirësisht pa të plagosur.
60-vjeçari Flamur Veliu, banues në qytetin e Lushnjës, u arrestua nga kolegët e tij pasi dyshohej se kishte shkaktuar aksident për shkak të gjendjes së dehur.
Aksidenti ka ndodhur në vendin e quajtur “Mulliri i artë”, i cili ndodhet në segmentin rrugor Fier-Lushnjë, rreth 3 kilometra në dalje të qytetit të Fierit. Nga ana tjetër, Policia e Fierit deklaron se shkak i aksidentit mund të jetë bërë gjendja e shefit të Komisariatit Patos.
Ndërkohë, pas ngjarjes mësohet se ka qenë vetë shefi i Komisariatit, Veliu, ai që ka njoftuar kolegët duke u treguar se ka përplasur tri makina të tjera në rrugë. Ai iu ka kërkuar atyre që të shkojnë në vendngjarje dhe të kryejnë veprimet, teksa i ka pritur edhe vetë në vend. Edhe pse nuk ka pasur dëme në njerëz, por vetëm dëme materiale, shefi i Policisë ka kërkuar ndihmën e kolegëve. Këta të fundit, pas testit të alkoolit e kanë shoqëruar për në komisariat.
Veliu kishte rreth dy vite në këtë detyrë dhe është njohur për marrëdhënie korrekte në punë. Disa burime tregojnë se pas pune, ditën e djeshme ai ka qëndruar me miq në qytetin e Fierit ku edhe kanë pirë.
Ndërkohë, vetë Veliu ka thënë për kolegët se nuk kishte pirë aq sa të mos kontrollonte mjetin. Aksidenti sipas tij ka ndodhur për shkak të fluksit të mjeteve në atë rrugë dhe parakalimeve të shpejta, çka ka krijuar kaos në trafik në çastin e përplasjes. Por pavarësisht justifikimit të tij te kolegët në Fier, këta të fundit me ndërhyrjen e SHÇKB-së i kanë komunikuar ndalimin.
