7 vjet më parë akuzonin njëri-tjetrin për shpërdorim fondesh dhe falsifikim dokumentesh. Sot ulen bashkë me rastin e 25 vjetorit të krijimit të Departamentit të Gjuhës, Letërsisë dhe Qytetërimit Grek në Universitetin “Eqrem Cabej” në Gjirokastër. Është fjala për Gëzim Salën dhe Panajot Barkën. Mbrëmë u organizua një darkë festive, ku ndër të tjera mbajti një fjalë përshëndetëse edhe dekani i Fakultetit të Shkencave Shoqëore dhe Edukimit, Gëzim Sala. Por cila ishte përplasja mes tyre 7 vjet më parë?
Në qershor 2011, Gëzim Sala, asokohe rektor i Universitetit të Gjirokastrës, akuzonte pedagogun Panajot Barka se i kishte falsifikuar firmën në dy dokumente gjatë një aplikimi për një projekt ndërkombëtar me vlerë rreth 380 mijë euro. Universitetit “Eqrem Çabej” ishte një prej partnerëve në këtë projekt dhe do të përfitonte një laborator me vlerë 12 mijë euro, ndërsa pjesa tjetër ndahej në mënyrë të barabartë me pesë partnerët e tjerë.
Për këtë çështje, rektori Gëzimi Sala i bëri kallëzim Panajot Barkës dhe e shkarkoi nga detyra. Ndërkohë nga ana tjetër, Panajot Barka, në shenjë ‘hakmarrje’ e kallëzon penalisht Gëzim Salën për abuzime me fondet. Barka në kallëzimin e tij i referohej edhe një raporti të KLSH-së ku ishin evidentuar shkeljet e rektorit të universitetit. Një ndër pikat që Barka kishte kërkuar të hetohej ishte rasti i konstatuar edhe nga KLSH-ja për një vizitë që një grup pedagogësh dhe studentësh kryen në Universitetin Shtetëror të Qipros 4 vite më parë, në kuadër të protokollit të bashkëpunimit mes dy universiteteve.
Në këtë vizitë, të gjitha shpenzimet mbuloheshin nga qipriotët, ndërkohë që auditi i KLSH-së në vitin 2010 i konsideroi pagesat e udhëtimit të këtij grupi në shkelje të ligjit dhe kërkoi kthimin e pagesave të kryera. Fati i padive mes Salës dhe Barkës nuk u mor vesh se si përfundoi, por afërmendsh dihet se si mbyllen gjyqet në Shqipëri. Sot ata i kanë harruar përplaset dhe akuzat me njëri-tjetrin dhe shfaqen publikisht si bashkëpunëtorë e kolegë të Universitetit “Eqrem Çabej”. Ndoshta bënë pakt mes tyre për të mos ia nxjerr ‘të palarat’ njëri-tjetrit. Barka u rikthye si pedagog në universitet me kërkesë te rektori të ministres së Arsimit, Lindita Nikolla.
© AgjiroLajm.net
